مع بدء فاعليات معرض الكتاب كل سنة افتكر اول زيارة ليا لمعرض الكتاب اصلها كانت تحفة جدا

كنت لسه فى سنة اولى جامعة وهروح المعرض مع بنات من الجامعة وكان معايا بنوتة من نفس كليتى لكن اكبر منى

المهم ركبنا بدأ برنامج الرحلة واتعرفنا على معظم اللى كانوا معانا واللى كانت قاعدة جنبى زميلتى من كليتى وقعدنا نغنى ونعمل مسابقات لحد ما وصلنا

وقالوا التجمع فى الاتوبيس 3.15 عصراً



المهم كل مجموعة اتفرقت وبدأوا التجول فى المعرض

وكان اللى بيتجول معايا صاحبتى من كليتى وبنوتين تانين
وبعد فترة بقينا انا وصاحبتى

المهم ع الساعة 3.10 بدأنا انا وهيا نروح ع البوابة عشان نخرج واحنا فى طريقنا قابلنا بنات كانوا خارجين ووزملتى شافت معاهم كتاب كانت بتدور عليه من ساعت ما وصلنا

سألتهم جبتوه منين وقالتلى تعالى نجيبه وكانت السرايا مش بعيده قلتلها احسن نأخر ع الاتوبيس قالتلى متخافيش لسه فيه بنات فى المعرض وكان فيه ناس لسه رايحين المصلية

المهم رحنا وكان الكتاب فى آخر السرايا وطلعنا جرى واتلخبطنا فى البوابة وبعدين لاقينا البوابة اللى دخلنا منها

وطلعنا ندور على الاوتوبيس ان احنا نلاقيه ..

ابدا فص ملح وداب
وقعدنا نروح لحد آخر اتوبيس

ونرجع تانى لحد البوابة
واحنا مش مصدقين طبعا ان الاوتوبيس يكون سابنا ومشى

المهم بعد كام لفة رايح جاى ايقنا ان الاتوبيس فعلا سابنا ومشى
قعدنا انا وهيا ناخد نفسنا ونفكر فى وضعنا الحالى

والحمد لله ربنا كان رزقنى بصاحبة توتر وعصبية
المهم شيلتنى معاها الهم هنوصلهم ازاى

لان كان فيه فقرة مفاجأة بعد المعرض منعرفش عنها حاجة

وقعدت اقولها يا بنتى احنا نركب مواصلات ونروح احسن


(آل يعنى خارجين من المعرض معانا فلوس)

وهيا مش راضية .. عايزة توصلهم

المهم المضحك فى الموضوع ان قبل ما الاتوبيس يبدأ الرحلة المشرفة ع الرحلة قالت يا جماعة خدوا ارقام موبايلات بعض وكده

خصوصا ان كان فيه ناس متعرفش بعض زى حالاتى انا وصاحبتى


وانا ساعتها مكنتش جبت الموبايل لسه فكبرت دماغى ..

لسه هكتب والنظام ده
المهم .. بعد حبة توتر منها وروقان منى يزيدها عصبية

قولتلها تعالى نتصل بوالدى هوه عارف زوج المشرفة وكان طالع معانا المهم طيب هنتصل منين ...

مش معانا فلوس ولا كارت ميناتل


رحنا على اقرب كابينة تليفون ولاقينا واحدة بتتكلم فيها استنينا لما خلصت

وطلبت منها اننا نستخدم الكارت بتاعها فى حالة طوارئ
حقيقى

كانت ذوق جدا لما عرفت القصة وسابت لنا الكارت


المهم اتصلت على والدى وقلتله القصة وقلتله اتصل على عمو فلان عشان يتصرف


قالى طيب اتصلى عليا بعد شوية وبعد الشوية اتصلت بيه قالى انه هايجى ..

واحنا بس نفضل واقفين قدام البوابة اللى دخلنا منها
وادانى رقمه عشان ابقى اتصل عليه

المهم قفلت معاه واتصلت على عمو
قالى انتوا فين قلتله قدام البوابة متحركناش طيب احنا جاين فى عربية ملاكى لونها كذا ( مش فاكرة المواصفات اللى كان قالها )

قلتلوا ماشى مستنينكم
وبعدين بدأ يوصينى نظام انى صغيرة وكده متخافوش احنا جايلكم بسرعة ..

واوعى حد يقولكم انا اروحكم والنظام ده
حقيقى كنت ببتسم وهوه بيوصينى ...

وانا اقوله متخافش هوه احنا صغيرين
رحت انا وزميلتى وقعدنا قدام البوابة من برة عند الطريق ...

وعلى اقرب عربية وقعدت
المهم اللى هيجوا بسرعة جم بعد المغرب وكان الجو ليل والمنظر كان روعة وتحفة ..

وبجد كنت مستمتعة بالجو
وصلوا الحمد لله .. ورحنالهم كانوا فى الهرم ووصلنالهم ع العشا

وهناك بقى كانت المفاجأة الكبرى ان محدش عرف اننا مفقودين غير لما دخلنا عليهم وبيسألونا انتوا كنتوا فين

وطبعا كل مجموعة تقعد تسألك ايه اللى حصل ومستنية تحكيلها القصة من المبدأ للنهاية


القصة حكيتها حوالى بتاع اربع مرات

بس بجد الرحلة كانت تحفة جدا واللى كان مخليها كده الموقف بتاع الاتوبيس

ده كفاية انها الزيارة الوحيدة لمعرض الكتاب اللى فاكراها بتفاصيلها ومش هنساها

عشان كده يا جدعان اللى يحصل معاه ان الاتوبيس يمشى ويسيبه

يستمتع باللحظة لانها هتكون اجمل حاجة حصلتله فى الرحلة كلها

:)

21 شاركونى:

الطائر الحزين يقول...

مقلتيش جبتى كتب أيه؟

افضل اللحظات غير المتوقعه لها وقع خاص على النفس

تحياتى

the others يقول...

صعبتي عليا كمان مش حسان بيكم لا معلش كده مفيش نظام ..انت ما تعرفيش رحله طالعه المعرض السنه دي ولا خلصت توبه ؟؟

Hossam يقول...

hello
دى اول زيارة ليا هنا
بجد مدونة لذيذة
وعلى فكرة انا كل سنة بستنى المعرض ده
وهروحوا قريب اوى
للاسف هو افتتح انبارح وكان عندى امتحان ومقدرتش اروح
بس هدفى المرة دى هى مجموعة كتب
paulo choelo and margrete atwood
اتمنى نتقابل هناك
اشوفك قريب
باى باى

عصفور المدينة يقول...

:)

الحمد لله أخدتم وقتكم كامل

نهياوية يقول...

ازيك ياجمييييييل
كل معرض كتاب وانتي بخير
وصراحة موقف تحفة
تعيشي وتفتكريه وانتي سعيدة يارب
تحياتي

صاحب المضيفة يقول...

موقف رايق وحصل لي واحد مشابه مع اخواتي البنات

قعدت أدور عليهم السنة اللي فاتت برضو

والحمد لله لاقيتهم بعد تعب على الاخر

دمت بخير

Hosam Yahia حسام يحيى يقول...

انا برده اتكرر معايا موقف مشابه اول امس
الاتوبيس سابنى انا وواحد زميلى ومشى
وطبعا فرحنا

وانطلقنااااااااااا

مشروع انسان يقول...

ما شاء الله حضرتك عندك رباطة جاش
ممكن فيه ناس بالمواقف دى بتنهار
خصوصا البنات

وكمان سايبة ذكرى حلوة :)

اسلام رفاعى يقول...

اى بنت لو لقيت نفسها فى موقف زى اللى حضرتك كنت فيه اكيد مش حتتمالك نفسها

Unknown يقول...

:)
معرض الكتاب ده متعه ما بعدها متعه
انا روحته مره واحد بس لسه فاكراها لحد دلوقتى....
مع ان حصل فيها حاجات مش حلوه خالص هحكيهالك بعدين
جزاكي الله خيرا حبيبتى
دمتى بود في امان الله

غني يابهيه يقول...

اول زياره ليا
مدون جديد
المدونه بجد حلوه
وان شاءالله اشوفك بعد زيارتى للمعرض
ياريت تشرفى مدونتى
غنى يابهيه

ابن حـجـر الـعـسـقـلانـى يقول...

بصراحة اللى بيبقى أجمل من الرحلة .. الكوارث اللى فى الرحلة
:)

طبعا ذكريات جميلة

noha يقول...

تعرفى أجمل حاجة فى الدنيا ..
انك تعيشى كل لحظة فيها زى ما هى
والاجمل ان تكون اللحظات دى مليانة بحاجات ابنورمال :D

وبغض النظر عن دافع الرحلة واللى فيها فيكفى السفر

منتهى المتعة :)

ربنا يسعدك يااارب

غير معرف يقول...

هههههههههههههههههههههههههه
اه فكرتينى
لا والمهم
ان احنا مكتشفناش عدم وجودكم الا لما جيتولنا المكان اللى كنا فيه بعد المعرض
مع انهم فى الاتوبيس قعدو ينادو فى حد ناقص واحنا نقول لا
طب فى واحده اللى قاعده جنبها مش موجوده
واحنا طبعا نقول لا
لانك انت وصحبتك كنتو تايهين
هههههههه
بس تعرفى كانت افضل رحله لمعرض الكتاب
رحتها حتى الان

يارب جمعنا تانى

محمد عـنـانـى يقول...

هههههههههههههه
والله موقف جامد
بس السؤال المحير كل الاتوبيس معرفش ان هناك مفقودين
اويمكن ان الاتوبيس كلو مفقود
الحمد الله ان ربنا يسر
وكل معرض وانتى طيبه

3abdo me7tas يقول...

السلام عليكم ممكن تكون دى اول مرة بالنسبة ليا انى ازور البلوجر بتاعك
بس طريقتك فى حكاية اللى حصل ليكي فى البوست ده شديتنى انى أقرى البوست لآخرة
المشكلة انا عايز أعرف عملتو ايه فى كارت الميناتل بعد ما خلصتو طيب هو كان فيه كام
بهزر طبعا
بس كويس انك قدرتى تفكرى فى الموقف ده وتتصلى بوالدك
وحمد الله على سلامتكم يا ستى

سارة بندارى يقول...

هههههههههههههههههههه

ايه يا بنتى الفيلم الهندى ده

المهم تكونى حرمتى

ولا اييييييييييييييه

تحياتى

Mohamed Abdelgeleel يقول...

الحاجة الوحيده الي بحسد بتوع القاهرة عليها معرض الكتاب ده

فتاه الجنه يقول...

بجد فصه جميله تحسى فيها انها من حكايات الف ليله وليله
على العموم حمدلله على السلامه يا جميل .

بنت أبيها يقول...

الطائر الحزين

صحيح .. وان كان فيه ناس مش بتحب اللحظات غير متوقعة

-------------------------------------

The others

شوشو عاملة ايه

حمدا لله على وصلك بالسلامة من المعرض يا قمر

-----------------------------------

hossam

حسام اهلا بيك فى زيارتك الاولى

اتمنى اشوفك دايما

للاسف مرحتش المعرض السنادى

يلا يمكن اشوفك السنة الجاية

:)

---------------------------------

عصفور المدينة

جدا

----------------------------------

نهياوية

ازيك يا بسكوتة

ربنا يخليكى

-----------------------------------

صاحب المضيفة

يا هلا

الحمد لله انك لاقيتهم .. بس الاجمل انك انت اللى تكون تايه مش حد تايه منك

-----------------------------------

حسام يحي

ماشية معاك يعنى

تعيش ويسبك الاتوبيس ويمشى

:)

-----------------------------------

امام الجيل

معاك حق

الحمد لله على نعمه

-----------------------------------

اسلام رفاعى

مش للدرجة

انتوا واخدين فكرة وحشة ليه عن البنات

:)

-----------------------------------

حطم القيود

اديبة الغد

مرة واحدة ومفكرتيش تروحى تانى

يلا السنة الجاية نروح مع بعض ماشى انا بقلك اهوه ومن غير اعذار

حوشى من دلوقتى بقى

:)

-----------------------------------

جمهورية مصر العربية

الجمهورية كلها عندنا يا دنى النور يا دى الهنا

اهلا وسهلا بيك فى المدونة

وتشرفت بزيارة مدونتك

-----------------------------------

ابن حجر العسقلانى

هو مش الكوارث انما نقدر نقول الاشياء غير اعتيادية

لان معنى الكوارث كبير وممكن يكون مثلا حادثة

جوزيت خيرا ع المرور

وفعلا اى حاجة بتكون غير اعتيادية بتكون ذكريات جميلة

-----------------------------------

noha

منورة المدونة يا حتة سكر

تمام كلامك .. وانا زيك بحب السفر جدا

---------------------------------

من القلب

كيفك وكيف اياد ابنك ؟

ما انا عرفت انكم عملتوا كده ومكتشفتوش اننا لسه مرجعناش من المعرض

يلا كل رحلة وانتى طيبة

-----------------------------------

محمد العنانى

يا هلا بيك فى المدونة

هما زى ما من القلب قالت سألوا فيه حد صاحبتها ما جتش .. فيه حد جنبه ناقص

كده

وطبعا كنا انا وزميلتى اصحاب وقاعدين جنب بعض

بس

-----------------------------------

3abdo me7tas

اهلا وسهلا بيك فى المدونة وعلى فكرة مش المرة الاولى

ربنا يكرمك .. الله يسلمك

-----------------------------------

سارة بندارى

منورة المدونة يا بسكوتاية

احرم مين يا بنتى

ده الواحد زعلان انه مرحش السنادى

------------------------------------

محمد عبد الجليل

اهلا بيك فينك من زمان

انا معاك برضوا

-----------------------------------

فتاة الجنة

منورة يا عثل

الله يسلمك

Asmaa Fathi يقول...

انا بحب القرأءة جدا


وكل مرة انوى اروح تحصل حاجه تعطلنى


مش عارفه ليه


بس ان شاء الله السنه دى لازم اروح

علشان عايزه مجموعه كبيره من الدواوين الشعريه والكتب


تقبل تحياتى

وادعوك لزيارة مدونتى


وتدعى ((الـــــم قلـــــــم))

على الرابط

http://gana10.blogspot.com/