" ولا تهنوا ولا تحزنوا وأنتم الأعلون إن كنتم مؤمنين "


يا اهلنا في غزة ... كم نغبطكم

دعاؤنا لا ينقطع

دعمنا لا ينقطع

رجاؤنا لا ينقطع

كونوا كما عرفناكم دائما رمز العزة والصمود

يا اهلنا العرب ... ها قد حان الوقت

ادعموهم بكل ما تستطيعوا

بالدعاء

بالتبرع

بالمقاطعة

بنشر القضية بين الناس وتوصيتهم بالدعاء والتبرع والمقاطعة



هل نصحو ونفيق على الكوارث

نعشق الكوارث لتجعلنا في تجديد

ولكن دائماً تكون فترة وتعود الامور لسابق عهدها

نتظاهر

نغضب

نهتف

نشجب

ندين

لكن اين التاثير من ذلك

لا اقلل من قيمة كل ذلك

ولكن اقول اننا يجب ان نبحث بجوار كل ذلك عن شئ جديد

شئ يكون ذو تاثير وضغط حقيقي على الحكومات

مثل ان نقوم بعمل اعتصامات مفتوحة الايام حتى تحقق الحكومة مطالبنا

مهما يحدث فنحن في اعتصام حتى وقف العدوان وفتح المعابر ودخول الامدادات نحن في اعتصام حتى تحقق كل مطالبنا

ويكون ذلك على مستوى العالم او على مستوى بلد

لم لا؟

واسأل نفسك هل عندك استعداد لذلك.



نعيش حياتنا

ويكون فيها عامل الاختيار كبير

وقد تاتي لحظات لا يكون فيها اختيار

واهم ما يتبع الاختيار

هو اتخاذ القرار

واهم قرار مصيري

الارتباط

قديما ..... كنت لا اتخيل صعوبة اتخاذ قرار في اختيار مثله

فقد كان بالنسبة لي صلاة استخارة ........ وبيانات ومعلومات ....... وراحة وقبول

فمن اين تأتي الحيرة

ولكني كنت مخطئة

فقد كان قرار صعب الاتخاذ

صعب الثبات عليه

يصيب الرأس بالصداع من كثرة التفكير فيه

فهو ليس قرار نتائجه قصيرة المدى

وانما طويلة المدى جدا

فكيف يكون بسيطا

واتعجب لنفسي كثيرا

ومن تقلبها كثيرا وعدم استقرارها

فهي تجد القبول والراحة والاقتناع

ولكن سرعان ما يعود اليها القلق من صحة الاختيار


ويبقى السؤال المتلازم لها

ماذا لو ..........؟

وفي النهاية نأخذ بالاسباب ... ونترك علم الغيب لله


اللهم خير لي واختر لي



ملحوظة : تدوينة خللت من كتر ركنتها ... كاتباها تقريبا من اربع او خمس شهور :)
رحت الجامعة امبارح وحشني جوها والناس اللى فيها

فاصادف ان هوا وتراب والذي منه

بس مش اثر فيا كتير

المهم في البداية واحنا ماشيين سمعت في الاول صوت زغاريد

قلت مش وقت ظهور اي نتائج دلوقتي خالص

وبعدها مفيش ثواني سمعت صوت هتافات والجو ده

فرحت وقلت اما نروح نشوف فيه ايه

فلاقيت شباب وشابات برضوا ماشية وماسكين لافتات

والجو كده غريب عن المعتاد

وخصوصا ان عددهم كان قليل ومش منظمين عن ما كان الواحد متعود على المظاهرات في الجامعة

المهم سالت البناويت اللى ماشين هوه فيه ايه والكلام ده

قالتلي ان المظاهرة دي اللى عاملها الاتحاد والاسر مشاركة

(وشفت فعلا بادجات مكتوب عليها لجنة النظام واسم اسرة بس مش اسر كتير تقريبا اللى شوفتهم اسرة او اتنين)


وان المظاهرة دي عاملينها دعماً لمنتظر الزيدي

اول كلمة جات على لساني ظاهرة صحية

ايوة ظاهرة صحية

ان حد تاني غير الاخوان في الساحة الطلابية يقوم بعمل مظاهرات


فهي ظاهرة صحية

حتى وان كانت المظاهرة كانت مش منظمة ومهرجلة ومفيهاش اي عدد اذا عملنا مقارنة

فهي ظاهرة صحية

حتى وان كان الشباب كانوا فرحانين لمجرد المنظرة .. ومفيش هدف في الدماغ


فهي ظاهرة صحية

حتى وان كانت كلها على بعضها مكملتش نص ساعة

فهي في النهاية ظاهرة صحية

اتمنى تتكرر ... وتنضج

اليكم بعض الصور









فلسطين ... في القلب هواكي

فلسطين .. يهفو إليكي فؤادي

فلسطين ... وهل ننساكي

فلسطين .. يا جرحاً ينزف

غزة يا رمز العزة

غزة يا من تشتد عليه الكربة

ليس لنا الا اسلحتنا

المقاطعة .. الدعاء .. التبرع

فهل نتخلى عن اسلحتنا ونسهو عنها



لا اجد الكلمات التي تعبر عما يجول بداخلي وعن مشاعري

ولكن من منا يعرف هل خيرا له ان يكون من بين الاحياء فوق هذه الارض

ام ان الخير له ان يكون من الاموات تحت هذه الارض

حبيبتي .... هكذا عرفتك دائما


مبتسمة ... مستبشرة ... متفائلة ... صابرة

وهذا ما رأيته اكثر في آخر ايامك معنا في مصر

حقيقة كم كنت حزينة من اجل مرض والدك في هذه الفترة

ولكني كنت معجبة بصمودك .. وصبرك

وحقيقة كم كنتي دائماً قدوة لي


آباكِ .. نعم تعاملت معه قليلا

لكن عرفته دائما

رجلا كريما

رجلا حريصا على دينه

رجلا .. محبا وعطوفا على اولاده

رحمه الله رحمه واسعه ... وادخله فسيح جناته

وجعلكي ووالدتك واخوتك من الصابرين المحتسبين

شاهدت بالامس برنامج العاشرة مساءا

وشاهدت فيه مواجهة بين موسى مصطفى وزوجة ايمن نور

حقيقي المواجهة كانت بتظهر حال المواجه بين الحزب الحاكم والمعارضة بشكل كبير

فاسلوب موسى مصطفى في الرد على اي سؤال هو اسلوب السفسطة

بجد انا عمري ما شفت سفسطه بالمنظر اللى شوفته امبارح ولا الامبالاه والبرود

ايه ده

كل سؤال يتسأل ليه كان جوابه محدد

دي عميله للخارج ... وبتؤلب الخارج علينا

وهيا السبب في منع المعونة الامريكية عنا

ولازم تتسجن

حقيقي حرقة دم ... واستخفاف على اعلى مستوى بالعقول

لا اعرفها ... ولا تعرفني

ولكن شاء القدر ان اراها واتعلم منها

على الرغم من بساطتها

ولكني حقا اشكر الله ان ارسلها لي ... واشكرها

قابلتها في رحلة من رحلاتي للقاهرة

في حديقة الفسطاط

كانت عاملة في دورات المياه

كنا قد دخلنا لنتوضأ للاستعداد للصلاة

ودردشنا معها قليلا في اثناء انتظار باقي زملائنا

كانت تتكلم عن حياتها ... ومدى المعاناة التي تعيشها

ولكن اكثر ما تعلمته من كلامها .. النظر للنعم التي قد لا ندرك انها نعم كبيرة في حياتنا

كانت تحكي لنا عن حياتها

وعن زوجها الفاسد ... وسببه في تراكم الديون عليهم

حيث بدأوا في بيع اثاث المنزل .. اثاث وراء الآخر

حتى باعوا ابواب الغرف ... والدور القادم على باب الشقة

بجد متتخيلوش .. ان بعدها كلامها قعد يرن في وداني كتير

وخصوصا انهم باعوا أبواب الغرف

وروحت وفكرت اني اقضي يوم من غير ما اقفل باب غرفتي كأنه مش موجود

متتخيلوش الوضع كان صعب ازاي

بجد مكنتش اتخيل ان باب غرفتي ده نعمة كبيرة ربنا عطيهالي مش مقدراها

ومن ساعتها وانا على طول بلاحظ كل نعمة ظاهرة او خفية واشكر ربنا عليها

وبدعيلها دايما ... وبشكرها

ويكرمها ويوسع رزقها اينما كانت
رحــلــــــت يــا رمــضــــــــــان

رحلت يا رمضان ببركتك

رحلت يا رمضان بروحانياتك

رحلت يا رمضان بالصلاة والتجهد حتى الفجر

رحلت يا رمضان بالسباق في ختم القرآن

رحلت يا رمضان باللمة في الفطار

رحلت يا رمضان بالسحور

رحلت يا رمضان ورحلت معك اعز اصدقائي للخارج

رحلت يا رمضان وبرحيلك اكدت لنا مدى سرعة مرور الوقت

رحلت يا رمضان بليلة القدر

رحلت يا رمضان بالرحمة والمغفرة والعتق من النار

وجــئــــــــــــــت يـــا عــيـــــــــــــد

جئت يا عيد بفرحة مجيئك

جئت يا عيد بصلاة العيد

جئت يا عيد بالصواريخ والمفرقعات والبالونات

جئت يا عيد بالعيدية

جئت يا عيد بالتزاور ورؤية الاحباب

جئت يا عيد بالسفر والفسح


فاللهم تقبل منا رمضان


يا ترى فكرتوا قبل كده

متر الجنة بكام؟

على ذكر ازمة غلاء الاراضي ... وسعي الناس انها تشتري امتار لبنائها..


ويا ترى في رمضان هنشتري كام متر في الجنة؟؟

يا ترى فكرتوا تشتروا كام متر في الجنة؟



متنسوناش في دعائكم ....



-------------------------------------------------------------

خارج الإيطار

معتاد في بيتنا التليفزيون ده يغلق بالحديد مع بدء أول رمضان

فمن يوم فطرنا عند جدتي ... وكان التليفزيون شغال واحنا بنفطر

طبعا اخدت صدمتين ...واحدة قاتلة ... وواحدة جميلة

الاولى ... اني لاقيت بعد الأذان ومدفع الإفطار المفروض ايه يكون دعاء الشيخ الشعراوي (دعاء الإفطار)

لكن اللى لاقيته وخلاني اتنح ان (هند صبري) هيا اللى بتقول (دعاء الإفطار) وايه التقوى والإيمان في صوتها وهيا بتقوله ... بجد انا تنحت لدرجة ان ماما اخدت بالها ... وقولتلها شايفه الاستهزاء بعقول الناس

التانية ... كان فيه اعلان بجد عجبني جداً .. بس مضيعش صدمتي الاولى خالص

كان بيتكلم عن الفشخرة والمنظرة اللى بتحصل في البيوت المصرية ... وان الاسرة المصرية بتصرف في رمضان اضعاف ما بيكفيها في السنة كلها

وفي ختام الاعلان ... كلمة كانت جميلة بس للاسف مش متذكراها بالحرف انما كان معناها ان بواقي الاكل اللى بتترمي في رمضان بعد العزومات والذي منه ... فيه اسر كتير مش لاقيه نصه

طبعاً كانت صدمتي في ده ... اني مش معتادة من التليفزيون المصري وجود إعلانات هادفة بالشكل ده


ودمتم مغفور ذنبكم معتوقين من النار


تدوينتي الخاصة برمضان الماضي
جلست يوماً اتفكر في احوال البشر ...

فوجدت بشرا متضايقون في عيشهم

يتمنون الرحيل من بلادهم ... الى بلاد تعطيهم فرص حياة افضل

ووجدت بشرا يتهافتون على المال كتهافت الذئاب الجائعة على الفريسة

وجدت بشرا تغلبهم الانانية

وجدت بشرا لا يشعرون بمعاناه من حولهم من البشر

وجدت بشرا يسبحون في الفساد

وجدت بشرا يعيشون في غابة مبدأها القوة

فتفكرت في الفئة الاولى التي تشعر بضيق العيش ... وترجع ذلك الى الغلاء


هل يا ترى العامل الاساسي الذي يجعلنا نضيق بالعيش في هذه الدنيا وهذه البلد هو ارتفاع الاسعار والغلاء؟

لا أعتقد ذلك في الحقيقة

فعلى عهد الرسول صلى الله عليه وسلم في بناء الدولة الإسلامية .... كان هناك الكثير من الفقراء.

حتى قيل "لو كان الفقر رجلاً لقتلته".

انما أتدرون ماذا...

انما هو سوء الخلق وانعدام الذوق وحسن المعاملة بين الناس بعضهم بعضاً...

أكثر ما أكد لدي ذلك ... فترة ارتفاع اسعار المواصلات

كان السواقين في منتهى قلة الذوق في التعامل مع الناس ... في طلب الأجرة

كان ابسط رد كان ممكن يردو بيه على الناس ... يا جماعة مش بادينا هنعمل ايه يعني

انما الواقع كان الوقاحة في الرد وسوء الادب

والكثير من المواقف الحياتية التي لو دققت فيها لوجدت انه لو وجد حسن الأخلاق والتعامل بين الناس

لتغير الحال كثييييراااا


فعليكم بحسن الخلق



عادات النجاح السبع



احفظوها عن ظهر قلب


وطبقوها عمليا في حياتكم




  • كن مبادراً
  • حدد هدفك
  • نظم وقتك
  • مارس مهارات التفاهم
  • ربح واربح
  • كون فريق منسجم
  • ابدأ وعينك على النهاية
  • جدد طاقاتك

واجب ومفروض علينا بعد ما كنا نسينا الكلام ده من زمان

نسطر الصفحة كويس الاول

وبسم الله نبدأ الحل :)


س :ـ أذكر اسم من طلب الواجب؟

حبيبة قلبي بنات افكاري ... شكلها بتفكر تشتغل مدرسة ولا حاجة ... وبتدي واجب عشان نحل :)


س :ـ قوانين الواجب ؟

ايه ده متفقناش على كده

طيب استني كده اراجع المنهج

ايه ده انتى بتجيبى اسئلة من خارج المنهج

هبلغ عنك .... طيب خلاص من غير ضرب

تدفعي كام طيب واسكت :)

س :ـ 6 أًٍسرار لا يعملها من يقابلني لاول مره؟

ستة بس .... يلا هختصر 1

- انى اتخرجت .. كل اللي يشوفني ميقولش اني خلصت


2- مزاجية شوية

3- عصبية شوية .. ودي بقى اللى كتييير ميعرفهاش عني خالص لانها مش بتظهر كتير .. وكل اللى بيشوفني يقول عني هادية

4- اني كنت هموت غرقاً وانا صغيرة تقريبا في سن حضانة (اكتر فترة حصلتلي فيها حوادث كتير) .. لكن ربنا بعتلي حد ينقذني

5- اني بعرف اعوم وبحب السباحة جداً زائد التصوير.

6- انى لحد 3 اعدادي كنت بروح دروسي بعجلة :) .


س:ـ 6 مدونون أوجه لهم الدعوه مع الروابط +توجيه الدعوة؟

ستة بس ... مممممم ... بس انا هخليها مفتوحة ليا و للي ياخد الواجب مني

1-صاحبة مدونة حور الجنة ... الف مبروك الخطوبة وربنا يقومك بالسلامة عشان تحلي الواجب.

2- صاحبة مدونة الجيل القادم ... مدونة من محافظتي جديدة وشاطرة في امور المطبخ يعني ممكن نقول عليها استشارية فيه :) .

3- صاحبة مدونة حطم القيود .. صاحبة القلم المتميز .. دائما في تميز وتقدم يا حبيبتي .

4- صاحبة مدونة My Finger print .. دكتورة شوشو .. اللى ان شاء الله هتسيب بصمة في الحياة ومهنتها ... واللى انا اول زبونة عندها لما تفتح عيادة ان شاء الله :).


5- صاحبة مدونة من القلب ... ام اياد العسولة ... كلماتها دايما من القلب والى القلب.

6- صاحبة مدونة دنيتي الجميلة اللى سعدت جدا لما عرفت انها مدونة من محافظتي .. واتمنى اتعرف عليها اكتر .

7- صاحبة مدونة نهياوية .. اللى نفسي اتلم عليها عشان اكلمها.

8- صاحبة مدونة نسيم الجنة ... بتابع مدونتها بس قليلة التعليق فيها.

9- صاحبة مدونة ربة السيف والقلم ... قلمها يعجبني ودائما متألق.

10- صاحبة مدونة حكومة اوف لاين ... اللى مقصرة معاها كتييير ... واللى اكتر مدونة شوفتها غيرت اسم مدونتها كتير

11- صاحبة مدونة حتة سكر ... واللى هيا فعلا حتة سكر .. وده بمناسبة كل سنة وانتى دايما حتة سكر.

12- صاحبة مدونة My Private Corner إيما وركنها المفضل ... واللى بدعي ربنا إنى اقدر اروحلها.


13- صاحبة مدونة إنسانة ... وربنا يوفقك ويهديك للي فيه خير ليكي ويرضيكي بيه.

14- صاحبة مدونة Feelings Reveal انا كده سابقا.

15- صاحبة مدونة هاعيش واتحدى أحزاني .. سمسماية ربنا يوفقك.

16- صاحبة مدونة همسة قلم ... وهمساتها تعجبني والف مبروك على نجاح ابن خالتك ... وعقبال ما يدخل الكلية اللى كان بيتمناها.


17- صاحبة مدونة استرها يا رب ... وريستنا كلنا.

18- صاحب مدونة اكتب بالرصاص ... لعله يكفيه تصنع ويعود على اثر الواجب .

19- صاحب مدونة المضيفة .... وبنردله الضيافة :) .

20- صاحب مدونة في الصميم ... واكيد الرد على السؤال اكيد طبعا قادرين .

21- صاحب مدونة وشرفك يا بلدي سحابة وتعدي ... ونقوله بركة افراج الامتحانات.

22- صاحب مدونة اوعى تفكر .... والف مبروك على النتيجة وكل اللى يجيبه ربنا كويس.

23- صاحب مدونة حياتنا كلمات .... وفي انتظار جديد حياته.

24- صاحب مدونة ناجي العلي ... ورسوماته بتتكلم لوحدها.

25- صاحب مدونة مشروع فنان ... ومشروعه المختفي .. ممكن يكون فكر يفتح مشروع تاني :).

26- صاحب مدونة جهاد المصري.

27- صاحب مدونة كدا وبتاع .. والف مبروك على تحقيق الحلم.

28- صاحب مدونة عايز حقي و صاحب مدونة صور من بلدي وصاحب مدونة بيجاسوس المصري وصاحب مدونة الكاتب المصري .. لعلها تكون حجر في مياه راكدة

29
صاحب مدونة آه يا بلد ... عشان نكسر حالة الشعر اللى مالية المدونة ... :)


بس كفاية ايه ده كله .... ده انا لو فتحت مش هسكت



عجيبة هي تلك العلاقات الانسانية

معقدة هي ايضا

هل شعرت يوما بانك عجزت عن مجاراتها

فهي تزيد من ميزان حسناتك


تعمل على ارتفاع الهمم

تبعث الامل

تبعث الفرحة على القلب

تجعل الدماء تجري في العروق

تجعل النفس مستقرة

تصنع المجزات بالانسان

تجعلك متلازم مع اداة الاستفهام .... متى (امتى)؟

من ناحية اخرى

تسبب الاحزان

تسبب الاحباط

تسبب الاكتئاب

تسبب الشعور بالوحدة

تسبب الشعور بعدم الرغبة في الحياة

قد تكون عامل لزيادة سيئاتك

تجعلك متلازم مع اداة الاستفهام ... لماذا(ليه)؟

وقد تجعلك تتمنى اخذ اجازة مؤقتة من هذه الاحداث

لتفكر من جديد في حياتك

بمنظار جديد


فتجد نفسك يوما بعد يوم تتسع دائرتك الاجتماعية

وتتسع معها ارتباطاتك

وواجباتك

والتزماتك

ومسؤلياتك

فهل تستطيع ان توازن في علاقاتك ؟

لتعيش بمقدار متساوي يحقق لك حياة متزنة عاطفيا واجتماعيا واسريا ... الخ





ياااااه بجد مش مصدقة نفسي

امنية كنت بتمثاها ليا 3 سنين وبحلم اني اقدر احققها

وكنت حاطة لنفسي سنتين تاني عقبال ما اقدر احققها

بس الحمد لله اتحققت

بتكلم بالالغاز صح

الامنية دي كانت عبارة عن مشروع صغير

من 3 سنين كان عبارة عن حلم اسعى لتحقيقه

وان مكنتش عارفة ساعتها ... ازاى

انما كل اللى كان بالي من ساعتها انى استعد ليه بالخبرة

والحمد لله الخبرة في الـ 3 سنين دول فادوني كتييييييير اكتر مما كنت اتخيل

والموضوع ده خلاني افكر

المشروعات كتيييييييييرة جداً .... والكثييييييير منها ناجح

يبقى ليه نلاقي شباب عاطل عن العمل

اي مجال دلوقتي اصبح سهل انك تعمل فيه مشروع

واغلبها بيكون مجرد انك تكتسب الخبرة فيه بس

وهل مشكلة التمويل المالي بتكون السبب

اعتقد مش مشكلة برضوا

لان بقى فيه دلوقتي مؤسسات متخصصة في تمويل المشروعات الصغيرة

واكيد هيلاقي اللى يساعدوا لو لاقاها انسان جاد فعلا في مشروعه

بجد رسالة لكل شاب

فكر ... ودرب نفسك ... وجرب

متقعدش حاطط ايدك على خدك

أخلاقيات اسلامية نفتقدها

في الطريق

القاء السلام : جرب تعملها كده .. والراكب يلقي السلام على الماشي والقاعد ... الماشي يلقي السلام على القاعد .. شوف هتقابل كام انسان في طريقك وانت رايح الشغل راجع من الشغل .. خارج .. داخل الخ ... وبص على عداد حسناتك .

غض البصر: ومش معناه انك تمشي اعمي في الطريق ... انما معناه انك تقتصر من اطلاق بصرك على الضروري فقط ... ودي بقى بجد هتحسوا بحلاوتها في القلب ... زائد اني بحس ان اطلاق البصر عامل من عوامل التشتيت وعدم التركيز ... اصل بصوا الدماغ دي زي الهارد بتاع الكمبيوتر بتاعك ... لما تمليه بحاجات كتييير وملهاش لازمة وملهاش اول من أخر ... هتلاقي نفسك تايه وانت بتتعامل معاه ومش عارف توصل لحاجاتك المهمة.

الأمر بالمعروف والنهي عن المنكر:
ودي بقى هي سر أيام زمان اللى الناس بتشتاق انها ترجع من صلاح الناس ... واخلاقهم الجميلة ... لاني بتعبره نوع مهم جدا في التربية ... وهو تربية المجتمع ... والتربية دي بيكون ليها تأثيرـ في معظم الاحيان ـ أكبر من تربية الوالدين .. وبتساعدهم كمان
.

كف الأذى: والأذى بكل أنواعه واشكاله ... وكمان ممكن يكون إماطة الأذى اللى انت هتكون سبب فيه .. ايا كان الأذى سواء بصري او سمعي ... دمتم كافين ومميطين للأذى غير متسببين فيه



ذات يوم قال النبي صلى الله عليه وسلم لأصحابه: (إياكم والجلوسَ على الطرقات) فقالوا: ما لنا بد، إنما هي مجالسنا نتحدث فيها. قال صلى الله عليه وسلم: (فإذا أبيتم إلا المجالس؛ فأعطوا الطريق حقها). قالوا: وما حق الطريق؟
قال صلى الله عليه وسلم: (غض البصر، وكف الأذى، ورد السلام، وأمر بالمعروف، ونهى عن المنكر) [متفق عليه].


بالامس كنت استمع إلى حصاد اليوم على قناة الجزيرة

وعلى أثر قرار بزيادة عدد المستوطنات اليهودية في القدس

وكان يدور حوار بين مقدم الحصاد وبين شخصية يهودية اسمه مردخاي كيدار - قسم الدراسات العربية في جامعة بار-إيلان (تل ابيب)


هحط بعض الجمل من حواره

- القدس مدينة لليهود فقط

- القدس لا تخضع للمفاوضات نهائيا

- لا شأن لكم باليهود

- الإسلام اقصى اليهود من القدس

- ليس لاي دولة في العالم سيادة على الضفة الغربية فإذا كيف تكون محتلة ، لذلك نتمكن من اقامة دولتنا عليها

- القدس لم تذكر ولا مرة في القرآن الكريم

كلام مستفز يحرق الدم ... ده للى عنده دم

ده حتى المحاور اللى بيكلمه من القناه حاسه انه لو كان يطوله ويمسك في رقبته كان عملها

وتشوفه وهوه بيتكلم بتعصب شديد للموضوع ... تقول وارثها ابا عن جد ولا حاجة


معنديش تعليق على الموضوع ده

كفاية انكم تعرفوا قد ايه الموضوع ده عبارة عن عقيدة

وفي دمهم وغير قابل للنقاش ولا التفاوض ولا التنازل



فهل القدس بالنسبة لنا عقيدة؟؟؟؟


خدمة جديدة بيقدمها موقع Google


مميزاتها اللى اكتشفتها لحد دلوقتي

1- وضع قوائم ادوات في صفحة واحدة ... زي الساعة واليوم والتاريخ ـ القارئ ـ الأخبار ـ أخر الافلام المضافة ليوتوبيا ـ واي أداة تانية انت تنشئها بنفسك وتعتبر دي أهم ميزة فيها ...... وخصوصا ان ممكن تضيف ادوات كتيير للصفحة .... زي البريد الإلكتروني الخاص بجوجل .. وممكن تحط جوجل توك وكمان قائمة مهام ... زي ترتيب لأولوياتك ومواعيدك

2- تغيير شكل الاستايل بتاع صفحتك زى ما تحب من اشكال بيتم تجديدها ـ خصوصا لو كنت من هواة التجديد ـ

3- ممكن في اي وقت ترجع للصفحة الكلاسيك بتاعت جوجل

ممكن تستكشفوا بنفسكم باقي المميزات









تحديث

الموضوع نزل على شخابيط روحوا شوفوه

http://shkhbat.blogspot.com/2008/05/blog-post.html

----------------------------------------------------------------------

حديث سابق بفترة عن اليوم


بنات افكاري : ها كنتى بتقولي انك هتعملي موضوع عن الكورنيش على شخابيط

بنت ابيها : اة بس اللى مخليني مأجله الموضوع اني لسه مش متوفر تحت ايدي كاميرا .. وانا من النوع اللى بيكتب الموضوع بعد الصور .. لانها هيا اللى بتديني ايحاء للموضوع

بنات افكاري : بس كده طيب انا هوفرلك الكاميرا

بنت ابيها : يا سلام الواحد مش عارف يودي جمايلك فين بس

وتم تحديد الميعاد مرتين وفي المرتين الظروف مسمحتش اني اشوفها مرة كان بسببي ومرة كان بسببها .. وفي المرة التالتة الحمد لله كانت تابتة :)

روحنا الكورنيش واليوم كان جميل جداً والشمس كانت مكسوفة ومستخبية ورا السحاب والهوا اكثر من روعة

بدأنا في التصوير ولما عدينا بتاع تلت الممشى لاقينا اتنين ضباط وعاملين حملة على اللى في الكورنيش من شباب

نظام هات بطاقتك وكده

وخصوصا الثنائيات الموجودة وخصوصا ان الساعة كانت 1.5 يعنى مش وقت خروج ولا ناس تتفسح

بس تقولوا ايه بقى

وبعدين احنا ماشيين عمالين نصور

وفرحانين بكارت الارهاب اللى -الضباط وواحد معاهم لابس ميري عاملينه

ولقطنة كام صورة ليهم وهما بيعملوا كده

وبعدين أخر واحد اخد منهم كام قفا وتلطيش محترمين

وصورنا صورة ومحدش خاد باله

وبعدين جنا طالعين من الكورنيش

والطمع جاب معانا وحبينا نصور صورة واحنا من برة

قام ضابط منهم شافنا وقال لواحد كان معاهم تقريبا كان مخبر

راح جري جه قالنا تعالوا كلموا الباشا عايزككم

انا قلت خلاص الصور اللى لاقطناها عليه العوض عليها .. واتمنيت ساعتها اننا نكون صبيان عشان كنا نعرف نجري ( مش خوف انما عشان نحافظ على الصور اللى لاقطناها)

المهم روحنالهم وكنت لابسة نظارة شمس رحت خلعتها لزوم الاحترام

واحد منهم قالي : ممكن الموبايل يا آنسة لو سمحتي

رديت عليه : ممكن اعرف ليه ؟

وكما توقعت مش بيرد على السؤال : ممكن الموبايل (من غير لو سمحتي)


وبعدين لاقيته هيتضايق وممكن يتصرف تصرف عنيف رحت عطهوله .. معرفش يوصل للصور سألني على مكانها وريتهومله

وقعد يقلب في الصور

وفي اثناء كده الضابط التاني سألني

انتوا منين

ريت قلتله : من بني سويف

بتدرسي ايه

انا خلصت

بتشتغلي

حاليا لا


وفي الجو ده حبيت نستغله حبه

رحت قلت : بس على فكرة احنا معجبين جداً باللى انتوا بتعملوه

اللى ندهنا ليهم مكانش مصدق اللى بنقوله : يعنى انتوا مبسوطين من اللى بنعمله

قلتله بصدق : اة طبعا فرحانين جداً كمان

الواحد كان بيعدي على الكورنيش كان بيشوف مناظر بيتأذى منها ويمكن اللى موجدين النهاردة وفي اوضاع جلوسهم محترمين عن مناظر تانية شوفناها قبل كده وياريت تستمروا في كده بجد

راح رد عليا : طول ما الباشا معانا هنضفها اول بأول

طبعا ابتسمت في نفسي على التعليق ده

المهم في الوقت ده كان وصل للصورة اللى ظاهر فيها القفا اللى عطاه للشاب .. وهنا بقى حسيت انى كان بيجز على سنانة وكأنه بيقول لولا انكم بنات .. وراح موريهم للضابط التاني اللى معاه

وفي وسط الحديث اللي كان شغال قلنالهم اننا كنا جايين نعمل موضوع صحفي عن الكورنيش لانه بجد اجمل منطقة في بني سويف وكان سألنا تبع انهي جريدة قلناله لا ده على النت

راح المخبر اللى كان معاهم ضحك وقال : كمان على النت .. طلعوني منها انا

فرديت عليهم : الموضوع مفيهوش اي اذية ليكم .. لان مفيش اي ملامح صور ظاهرة في الصور لاننا كنا بنصور من بعيد وحضرتك لو فيه اي صورة مش عاجبة وحضرتك وحاسس انها هتضرك امسحها مفيش اي مشكلة (آل يعنى هوه مكانش هيعمل كده .. بس نظام الواحد حب يكون ذوق ودبلوماسي)

وبعدين لاقيت واحد مش عارفة جه امتى واحنا واقفين راح قايل : يعنى الموبايل دلوقتي ممكن نرميه هووووب في النيل (بس باسلوب هزار)

راحت بنات افكاري ردت عليه : فداكم ولا يهمك

زى ما تقولوا اتكسف راح مبتسم وساكت

واخدنا الموبايل وقلنالهم احنا متأسفين ان كنا سببنا ليكم اي ازعاج ورحنا ماشيين من عندهم

وبعدين كملنا شغلنا من حيث التصوير وسؤال المسؤلين عن الكورنيش عن معلومات عنه وكده

وبعدين ركبنا تاكسي وروحنا وكنت نزلت قبل بنات افكاري .. فبعدين لما روحت وكلمتها ع الماسنجر

لاقتها بتقولي : اسكتي شوفت حتة منظر وانا فى التاكس بعد ماسيبتيني

قلتها : ايه ؟؟

شوفت ياستي امين الشرطة الرخم فى عربية البوكس من غير التاني وواخد اربع شباب من ورا وبنتين من قدام معاهم بس البنتين كانت حالتهم صعبة وعمالين يتحايلو عليه

-----------------------------------------------------------------------------

اسيبكم بقى مع صورتين شكلهم ما خادوش بالهم منها

وتبقوا تشوفوا الموضوع قريبا على شخابيط سويفية



لما تلاقي نفسك محاط بصحبة كويسة وبتحبك وبتعينك

فاعلم انه يحبك

لما تتحط فى مواقف صعبة .. وتخرج منها من غير اي خسائر

فاعلم انه يحبك

عندما يبتليك .. ويرزقك الصبر والحكمة في التعامل مع الوضع

فاعلم انه يحبك


عندما تنشأ في اسرة متفاهمة وملتزمة

فاعلم انه يحبك

عندما تسوء بك الاحوال .. وتجدها انفرجت

فاعلم انه يحبك

عندما تجد نفسك تسير بهدف تسعى للوصول إليه

فاعلم انه يحبك

عندما تجد نفسك بصحة جيدة

فاعلم انه يحبك

عندما تجد لديك قدمين تسير بهما

فاعلم انه يحبك

عندما تجد لديك عينين ترى بهما جمال خلقه

فاعلم انه يحبك

عندما تجد لديك موهبة تستغلها

فاعلم انه يحبك

والآن هل علمت علامات حبه لك ويوجد الكثير والكثير من العلامات التى لم اذكرها

ها قد أعلن الحبيب عن حبه

فهل تبادل حبيبك حباً ؟؟؟؟؟

فهل تعلن عن حبك ؟؟

فما هي علامات حبك له التى ستعلنها؟؟

على ما يبدوا ان الحكومة اصبحت تتبع سياسة خبط تخابيط

فمن الملاحظ ان الحكومة الفترة دي بقت بتخبط كتير

وبتستهبل كتير .. بزيادة عن اللازم وعن اللى كان بيحصل

وفى ظل فترة الاختناق اللى عايش فيها الشعب


في ظل حالة الشعب اللى وصل لمرحلة كما يقال في المثل الشعبي بيتخانق مع دبان وشه

يعنى الاوضاع مش مستحملة ... وفاقت كل حد

والحكومة ولا فى الدماغ

الضرايب ترفع ... هوا احنا بندفع ضرايب

الاسعار تولع ... واحنا مالنا اللى معهوش ميلزموش

الناس تاكل حمير ... حد قالهم يفكروا ياكلوا لحمة

كثرة نسب الشباب مدمني المخدرات ... وماله خليهم يتبسطوا ويعملوا دماغ


زيادة نسبة تجار المخدرات مع قلة عمل الشرطة ... وماله يعنى يقعدوا عطلانين من غير شغلة ولا مشغلة

زيادة الامراض من الاطعمة المسرطنة ... مين اللى قال كده ما الشعب مفيش حد فيه بيموت وقاعد بس يعلى صوته

زيادة حالات النصب والسرقة والنهب ... كل واحد يحرص على حاجته ، هيا الحكومة كمان هتعين حارس لكل واحد ولا ايه

(بمناسبة الموضوع ده حصل من قريب عندنا في المحافظة حالة سرقة بس كانت غريبة جدا .. الحرامي دخل البيت وكل الى عمله انه دخل على التلاجة مخلاش فيها ابيض ولا اسود والتموين بتاع البيت اخده بس)

وفي النهاية هختم بصورتين
عن خبرين حدثوا في نفس اليوم .. يعبروا عن حالة التناقض والانحدار اللى عايشة فيه البلد

الاولى : الحكم (عسكريا)بالسجن على 25 من الجماعة اياها في القضية اياها ( مقيدون )


الثانية : الحكم (مدنيا) ببراءة هاني سرور وكل من معه في قضية اكياس الدم الملوثة (الراجل متظبط وبيشرب السيجارة)




بكفاياكم

تجويعينا

اعتقال شرفاء هذا الوطن

اعتداء بالضرب ولم تسلم النساء منه


انتهاك كرامتنا


نهب حقوقنا

نهب وتهريب اموالنا

تسميمنا بالاطعمة الفاسدة ولحوم الحمير وغيرها

نشر الفساد في وطننا الحبيب

تقويتكم للبطلجية وحمايتهم

غلاء الاسعار وانتو في الباي باي

اسكات صوت الحق

اسكات صوت المعارضة

اما يكفيكم

دعوات الشعب عليكم

دعوات اسر المعتقلين عليكم

دعوات المظلومين عليكم

دعوات اسر ضحايا كوارث إهمالكم عليكم

زيادة نسبة البلطجة

زيادة معدلات الاجرام

--------------------------------------

بس تعرفوا الشعب خلاص بدأ في الإنفجار في وجهكم

ولا يوجد ما تحتمون به

خاصة ان الايام القادمة تحمل في طياتها العديد من الاحداث التى ستحدد مصير هذا البلد


فانتظروا معنا الايام القادمة وما تحمله لكم


يا ارض قومى وانطقى

والعنى وهزقى في الانسان لحد ما تستريحي

حاله متبهدل ومبهدلك معاه ومش قادرة تعرفي

ليه راضي وساكت ضرب القفا وانتى بتستعجبي

على اللى بقي مش فارقة معاه اديه بياكل وبيشرب ونفسك تضربي


كل اللى مش فاهم ان الدنيا مش اكل وشرب ونوم وازعقي

يا بشر فوقوا لحد امتى هتفضلوا بتبصوا تحت اقادمكم وتتكفوا

وتسكتوا على حقكم

بلاش دى عشان انتوا مش ساكتين

انما بتشجبوا وبتستنكروا وبتطلعوا غلبكوا على بعضكوا

مش معذورين ولا اذنكوا معاكم متتفضلوش

كلكم مسؤلين

ولحد امتى هتفضلوا مش فاهمين

وييتضحك عليكم بكلمتين

يلا جه وقت تحمل المسؤلية

جه وقت الجدعنة والشهامة


جه وقت الرجولة والإنسانية

جه وقت تحديد المصير


ولا انتوا عايزين تيعيشوا زيكو زى الحيوانات

تاكل وتشرب وتنام وتموت وتنقرض


احببتك منذ ان وعيت على الدنيا

ترعاني وتشملني بحبك

اقصر في حقك .. لكنك دائم الكرم

اتقرب اليك .. فتتقرب الي اكثر

اناديك واشكو لك حالى .. فتسمعنى في اى وقت

مهما حاولت ان اشكرك واوفي حقك

اجدني مقصرة .. واجدك لا تقصر تجاهى

في عطاياك .. في نعمك التى تغمرني

اجد لساني يعجز عن وصف حالي

واجد الكلمات تهرب من لسانى

لعلها تعلم انها لن تستطيع ان تشكرك او توفي حقك

فتمتنع عن المجئ

دائما يغمرني الشعور بوجدك معي

يغمرني شعور بالسعادة لانك إلاهي

يغمرني شعور بالرضا

انعمت علي بنعم كثيرة .. لن استطيع عدها

لكن ساذكر منها

اولها ان جعلتني إنسانة ولم تجعلنى حيواناً

ثانيها أن جعلتنى إنسانة مسلمة ولم تجعلنى كافرة بألوهيتك

ثالثها أن جعلتني إنسانة مسلمة بحق ولم تجعلني مسلمة بالبطاقة فقط

رابعها ان رزقتني بعقل به حكمة اجيد استخدامه

خامسها ان انرت لي بصيرتي في كثير من المواقف التى احمدك كثيرا بعدها على ان وفقتني لهذا التصرف فيها
سادسها ان رزقتني الصبر في الكثير والكثير من المواقف والاشياء

فاللهم ادمها علي من نعم وزدني من نعمك

فكيف اشكرك على كل ذلك

يكفيني انك تعلم سرى قبل علانيتي

يكفينى انك ربي
صور كتير بنشوفها الايام دى منها

شباب بيرفض العمل لاسباب كتير يمكن اكثرها نوع العمل

مدير عمل يبحث عن عمال ولا يجد

صاحب مصنع يغلق مصنعه لعدم وجود عمالة

شباب اعتمادى استهلاكى استهتارى احباطى مَظَاهِرى

ده كله يخلى الواحد يقول مصر فيها عطالة مش بطالة

ولا ايه رائيكم ؟؟؟؟؟؟؟
هل انت ضفدع؟؟؟



أجرى بعض العلماء تجربة على ضفدعة

فقاموا بوضعها في إناء به ماء يغلي .. فقفزت الضفدعة عدة قفزات سريعة تمكنها من الخروج من هذا الجحيم التي وضعت فيه.

لكن العلماء عندما وضعوا الضفدعة في إناء به ماء درجة حرارته عادية ثم اخذوا في رفع درجة حرارة الماء وتسخينه إلى أن وصل إلى درجة الغليان .

وجدوا أن الضفدعة ظلت في الماء حتى أتى عليها تماما وماتت دون أن تحاول أدنى محاولة للخروج من الماء المغلي.

العلماء فسروا هذا بأن الجهاز العصبي للضفدعة لا يستجيب إلا للتغيرات الحادة.. أما التغير البطيء على المدى الطويل فإن الجهاز العصبي للضفدعة لا يستجيب له

********************

هذا هو حال الحياة معنا دائما


التغيرات المحيطة بنا تغيرات بطيئة تكاد تكون مملة في مجملها.. ولكنها تغييرات مهمة حاسمة في معظمها

قارن بين حياتك منذ عامين وحالك الآن.. هل هناك تغيرات من حولك؟

حقيقة ستدهش من حجم التغيرات التي حدثت من حولك لكن كيف كانت استجابة جهازك العصبي لها

هل شعرت بأن صغائر الأمور هي في حقيقتها أمور جلل.. وأن معظم النار من مستصغر الشرر؟

هل كنت كالضفدعة التي تحركت الدنيا حولها وتغيرت وهي لم تفطن لهذا فلقيت حتفها؟

أم انك فطنت لما يجري حولك وسارعت جاهدا لتعايش التغيرات التي تجري حولك وتفكر في تطوير حياتك



هل كان حالك مع نفسك ومع الله كحال الضفدعة؟

فلم تفطن بالصدأ الذي يهبط على قلبك كل يوم وببعدك عن الله خطوة بخطوة إلى أن فوجئت بالبعد السحيق؟

كيف كان حالك مع اهلك؟

هل فوجئت انك أصبحت شخصا قاطعا لصلة رحمك ولم تفطن أن إهمالك في صلة رحمك وتسويفك لها قد أودى بك انك قد أصبحت بعيدا عن اهلك

كيف كان حالك عن نفسك؟

هل سعيت لتطوير نفسك وتعليمها ما جد من العلوم والكمبيوتر أم فوجئت أن الناس أصبحوا ينظرون لك على انك جاهل متأخر لا تدري الكثير عما يدور حولك

كيف كان حالك مع إخوانك؟

هل فوجئت الآن انك أصبحت بعيدا عنهم وأن مسافات شاسعة قد قامت بينك وبينهم من أمور استصغرتها أنت



الحياة مليئة بالصدمات

والتى يختلف تاثيرها من فرد لاخر على حسب تقبله لها وعلى حسب قربه

فالرسوب صدمة

خسارة صفقة صدمة

خيانة صديق صدمة

مشاهدة حادثة صدمة

خلافات عائلية صدمة
ودايما اكبر صدمة عند اى انسان هي صدمة الموت


وخاصة اذا كان قريب له او صديق عزيز عليه او احد اولاده


فهى الصدمة الوحيدة التى تجعل الانسان يقوم بعمل وقفه ويفكر فى الامر


ويفكر فى حاله ويعيد حساباته


ويعمل زى فورمات للمخ

وتكون بمثابة اختبار

ولكن ليس الكل يقوم بعمل ذلك


لكن هل فكرت للحظة انك قد تموت اليوم


واليوم لن اكلمك عن معاصيك وانصحك بالبعد عنها والاستغفار


لكن هكلمكم عن نقطة تانية


تخيل انك اتخانقت او زعلت والدك ـ اختك ـ اخوك ـ عمك ـ عمتك ـ خالتك ـ خالك ـ صديقك ـ جارك


وتانى يوم مات





هتندم كتير صح


وليه تخلى نفسك تندم


حط فى ذهنك دايما ان مفيش اى حاجة فى الدنيا تستاهل انك تخسر عشانها حد من اللى فاتوا

إلا اذا كان مش كويس وعاصى وبلا اخلاق




مع بدء فاعليات معرض الكتاب كل سنة افتكر اول زيارة ليا لمعرض الكتاب اصلها كانت تحفة جدا

كنت لسه فى سنة اولى جامعة وهروح المعرض مع بنات من الجامعة وكان معايا بنوتة من نفس كليتى لكن اكبر منى

المهم ركبنا بدأ برنامج الرحلة واتعرفنا على معظم اللى كانوا معانا واللى كانت قاعدة جنبى زميلتى من كليتى وقعدنا نغنى ونعمل مسابقات لحد ما وصلنا

وقالوا التجمع فى الاتوبيس 3.15 عصراً



المهم كل مجموعة اتفرقت وبدأوا التجول فى المعرض

وكان اللى بيتجول معايا صاحبتى من كليتى وبنوتين تانين
وبعد فترة بقينا انا وصاحبتى

المهم ع الساعة 3.10 بدأنا انا وهيا نروح ع البوابة عشان نخرج واحنا فى طريقنا قابلنا بنات كانوا خارجين ووزملتى شافت معاهم كتاب كانت بتدور عليه من ساعت ما وصلنا

سألتهم جبتوه منين وقالتلى تعالى نجيبه وكانت السرايا مش بعيده قلتلها احسن نأخر ع الاتوبيس قالتلى متخافيش لسه فيه بنات فى المعرض وكان فيه ناس لسه رايحين المصلية

المهم رحنا وكان الكتاب فى آخر السرايا وطلعنا جرى واتلخبطنا فى البوابة وبعدين لاقينا البوابة اللى دخلنا منها

وطلعنا ندور على الاوتوبيس ان احنا نلاقيه ..

ابدا فص ملح وداب
وقعدنا نروح لحد آخر اتوبيس

ونرجع تانى لحد البوابة
واحنا مش مصدقين طبعا ان الاوتوبيس يكون سابنا ومشى

المهم بعد كام لفة رايح جاى ايقنا ان الاتوبيس فعلا سابنا ومشى
قعدنا انا وهيا ناخد نفسنا ونفكر فى وضعنا الحالى

والحمد لله ربنا كان رزقنى بصاحبة توتر وعصبية
المهم شيلتنى معاها الهم هنوصلهم ازاى

لان كان فيه فقرة مفاجأة بعد المعرض منعرفش عنها حاجة

وقعدت اقولها يا بنتى احنا نركب مواصلات ونروح احسن


(آل يعنى خارجين من المعرض معانا فلوس)

وهيا مش راضية .. عايزة توصلهم

المهم المضحك فى الموضوع ان قبل ما الاتوبيس يبدأ الرحلة المشرفة ع الرحلة قالت يا جماعة خدوا ارقام موبايلات بعض وكده

خصوصا ان كان فيه ناس متعرفش بعض زى حالاتى انا وصاحبتى


وانا ساعتها مكنتش جبت الموبايل لسه فكبرت دماغى ..

لسه هكتب والنظام ده
المهم .. بعد حبة توتر منها وروقان منى يزيدها عصبية

قولتلها تعالى نتصل بوالدى هوه عارف زوج المشرفة وكان طالع معانا المهم طيب هنتصل منين ...

مش معانا فلوس ولا كارت ميناتل


رحنا على اقرب كابينة تليفون ولاقينا واحدة بتتكلم فيها استنينا لما خلصت

وطلبت منها اننا نستخدم الكارت بتاعها فى حالة طوارئ
حقيقى

كانت ذوق جدا لما عرفت القصة وسابت لنا الكارت


المهم اتصلت على والدى وقلتله القصة وقلتله اتصل على عمو فلان عشان يتصرف


قالى طيب اتصلى عليا بعد شوية وبعد الشوية اتصلت بيه قالى انه هايجى ..

واحنا بس نفضل واقفين قدام البوابة اللى دخلنا منها
وادانى رقمه عشان ابقى اتصل عليه

المهم قفلت معاه واتصلت على عمو
قالى انتوا فين قلتله قدام البوابة متحركناش طيب احنا جاين فى عربية ملاكى لونها كذا ( مش فاكرة المواصفات اللى كان قالها )

قلتلوا ماشى مستنينكم
وبعدين بدأ يوصينى نظام انى صغيرة وكده متخافوش احنا جايلكم بسرعة ..

واوعى حد يقولكم انا اروحكم والنظام ده
حقيقى كنت ببتسم وهوه بيوصينى ...

وانا اقوله متخافش هوه احنا صغيرين
رحت انا وزميلتى وقعدنا قدام البوابة من برة عند الطريق ...

وعلى اقرب عربية وقعدت
المهم اللى هيجوا بسرعة جم بعد المغرب وكان الجو ليل والمنظر كان روعة وتحفة ..

وبجد كنت مستمتعة بالجو
وصلوا الحمد لله .. ورحنالهم كانوا فى الهرم ووصلنالهم ع العشا

وهناك بقى كانت المفاجأة الكبرى ان محدش عرف اننا مفقودين غير لما دخلنا عليهم وبيسألونا انتوا كنتوا فين

وطبعا كل مجموعة تقعد تسألك ايه اللى حصل ومستنية تحكيلها القصة من المبدأ للنهاية


القصة حكيتها حوالى بتاع اربع مرات

بس بجد الرحلة كانت تحفة جدا واللى كان مخليها كده الموقف بتاع الاتوبيس

ده كفاية انها الزيارة الوحيدة لمعرض الكتاب اللى فاكراها بتفاصيلها ومش هنساها

عشان كده يا جدعان اللى يحصل معاه ان الاتوبيس يمشى ويسيبه

يستمتع باللحظة لانها هتكون اجمل حاجة حصلتله فى الرحلة كلها

:)