الجيش





اصبحت هذه الكلمة بمثابة بعبع الشباب

فالكل لا يريد ان يدخل الجيش

الكل يتمنى أن يأخذ الاعفاء



الكل يقول لأهله ان يدعوا له بأخذ الإعفاء


وهناك من يتحايل على الامر ولا يكتفى بالتمنى والدعاء


فهناك من يتمارض ويأتى بالشهادات الطبية المزيفة

وهناك من ياخذ برشام ليبدوا ضعيف القلب او ما شابه


وهناك من يتهرب من الجيش


وهناك من يقطع اصبع يده او قدمه


والعديد من الوسائل التى اصبح الشباب يبتكروا فيها


لمجرد أخذ الاعفاء


فلماذا اصبح دخول الجيش بعبع بالنسبة لهم


هل لان الجيش عبارة عن سباب وشتائم وجوع وبهدله ومرمطة






ام ان شبابنا اعتادوا على الترف والراحة والرخاء


ام ان سنوات الجيش ستقطع من عمره وقت يستطيع ان يجهز نفسه فيه ويهؤهل نفسه للزواج




ام ماذا؟؟؟؟؟؟؟


وسؤالى الاخير هوه



لماذا اصبح دخول الجيش بعبع او آفة بالنسبة للشباب؟؟؟؟؟؟؟؟


هل لديكم اجابة

17 شاركونى:

أحمد يقول...

مفيش سبب محدد يصلح للتعميم ؛ لأنها بتختلف , بين اللى عايز يشتغل ويجهز نفسه , واللى عايز يقعد على قهوة , وطبعا الأهانة والمرمطة والسُباب عوامل مساعدة ويمكن عوامل أساسية كمان .

تحياتى

:)

مش هنسى يقول...

بنت أبيها
أنا سعيد جدا لدخولى مدونتك بعد ما غبت فترة عن التدوين واليوم
على فكرة أنا خدت تأجيل من الجيش الفترة اللى فاتت وكانت دى أمنية والأسباب للأتى
الجيش لا يعلم شيئا بل هو عطلة للناس بشكل وهو يقطع أمال الشباب من سعى فى العمل والخطوبة والدعوة ودى الأهم
وبعدين هو بهدلة بشكل غير طبيعى غير ما بنسمع من أعجوبات القيادات هناكفى بهدلة الناس
الأمر الأخير الخاص بى إن الجيش مكنش محتاج لواءات الدفعة اللى فاتت لذلك طلعونى
تحياتى لك



أخر موضوعاتى
مبارك إنى أشكوك إلى الله

عصفور المدينة يقول...

أعتقد يا ابنتي أن المشكلة الرئيسية ليست إيثار الراحة لكن هما سببان رئيسيان

أولا كم الإهانات والإذلال والتعنت الذي يمارسه بعض الأشخاص المرضى من هواة التسلط والذي لا يمكن أن يصفه لك أحد بصفتك يعني فتاة لن تتصوري

ثانيا وهي مرتبطة بأولا :أن يكون ذلك بدون جدوى ومعطلا عن استمرار الحياة بعد أن ظل الشاب يعاني سكرات التعليم طوال هذه السنوات

أخـــ مسلمة ـــت يقول...

بلاش ندور علي ايه اللي بيخليهم يتهربوا

خلينا نقول هيستفيدوا ايه من الجيش لو دخلوه

ولا حاجة

أضيفي الي ذلك انه ماعادش فيه انتماء عند معظم الشباب و ده طبعا سببه الفقر في معظم الاحيان أو الغني الفاحش للبعض أحيانا أخري

قواتنا المسلحة يا اختي الحبيبه

فرغت تماما من محتواها

ماعادش شئ اسمه جيش في مصر

يبقي ليه يضيع 3 سنين من عمره في بهدلة واهانات و هو الخسران في الاخر

--------

بوست رائع

علي فكرة انتي وحشاني أوي

ابعتيلي ميلك علشان أكلمك

يلا سلااااااااااااام

الطائر الحزين يقول...

بما انى دخلت الجيش الا انى كنت اقول لزملائى دوما لا تجعلوا الجيش يغير الفاظنا ومصطلحاتنا لأن للجيش مصطلحات خاصة به وشتائم خاصة به

كنت اقول لهم ما دام السباب أت لا محالة لا تجعلوا السباب يكون بصفة منفردة لأى منا لكن مادام السباب للكل يبقى مبلوعة شوية

بعد اذنك ساحكى لك واقعه

اول ما دخلنا الجيش
كان فيه عسكرى ضرب ضابط وبما ان السيئة بتعم واحنا لسه منعرفش اى حاجة عن الجيش تعذبنا معهم بالوقوف (skin) فى عز البرد وياتوا بالماء مع البارد يرشوه علينا علشان نتعظ مع انه ساعات مكناش بنلاقى المياه

احكمى انتى

بس استفدت بصراحة التمرينات والانتظام فى المواعيد

Mohamed Abdelgeleel يقول...

كل الاسباب الي انتي قولتيها صحيحه بس اهمها انه بيضيع سنتين من العمر ممكن الشاب يعمل فيهم حاجة بس في موضوع تاني بردو كلمة بتتقال كتير ان الي مدخلش الجيش مش بيطلع راجل مش عارف ليه بسمعها كتير ومنتشرة

http://kasperb4.blogspot.com/ يقول...

شوفي يا بنت ابيها
مبدئيا كده عايز اقولك على حاجة مهمة اوي

اللي ايدو ف المية
مش زي اللي ايدو ف الناااار
هههههههههههه

الا صحيح هو ليه الناس اللي بتطالب بمساواة المرأة بالرجل ميعملوش جيش للنساء
:D

المهم الموضوع بتاعك ده جاامد اوي ومهم كمان
وعموما انا كنت هقول اللي قالو الباشمهندس عصفور بالظبط

انا عن نفسي لسة مدخلتش الجيش بس طبعا ليا صحاب وقرايب كتير دخلوه وحكولي على اللي شافوه
يعني قمة الذل والمهانة والقهر والضغط النفسي
كلها حاجات اصلا تقتل الانتماء جوانا اللي المفروض اساسا يكون تنمية وتقوية الانتماء ده من اهم اهداف فترة التجنيد
تعامل بعض القادة والظباط مع العساكر بيتم بشكل حاقد وغبي جدا وزي ما قال الباشمهندس يعتبرو مرضى والله وقال ايه بقى ان مبررهم للمعاملة دي انه عايزهم يبقو رجالة
يعني يبقوا رجالة ويكرهو نفسهم وبلدهم وعيشتهم كلها يعني
بصراحة كده عمري ما شوفت حد دخل الجيش وشكر فيه ابدااااا


معلش بقى طولت عليكي مع ان الكلام عن الحكاية دي كتير اوي ومينفعش اخلصه ف تعليق
لكن هكتفي بهذا القدر عشان متزهقيش مني
ولكي تحيتي وتقديري
:)

khobayb يقول...

عشان السبب الأول

والسبب الأخير

البهدلة والمرمطة

وتضييع الوقت بلا طائل يرجى

بيروح يشتغل صبي في عزبة الجيش الخاصة

ومن غير يومية !!

غير معرف يقول...

سلام عليكم
لو تحب ان حد يبهدل كرامتك او يقولك كلمه ملهاش لازمه وهو اساسا لا درجته العلميه زيك ولا الادبيه ولا الاخلاقيه ولا الدينيه عشان سلطه اعلي منك .. يبقي من حقك السؤال ده ؟

ا بـن عــمــر يقول...

مثلا ان واحد من الشباب
كليه الطب 7 سنين+
2تكليف+3 جيش
دا يرضى مين
وبعدين مرتبى كام
يا حسره
200 جنيه
يعنى
قد الموصلات

ا بـن عــمــر يقول...

مثلا ان واحد من الشباب
كليه الطب 7 سنين + 2
تكليف + 3 جيش = 11سنه
دا يرضى مين
وبعدين مرتبى كام
يا حسره
200 جنيه
يعنى
قد الموصلات

بنت أبيها يقول...

مبرمج حر

اكيد بتفرق من واحد للتانى انما انا بتكلم على الاغلبية

اكيد المرمطة عوامل اساسية بس المرمطة موجودة فى كل حاجة فى حياتنا .. ولا ايه

-----------------------------------

مش هنسى

وانا كمان سعيدة بدخولك للمدونة

مبروك على التأجيل

لا انا لا اتفق معاك ان الجيش لا يعلم شئ

-----------------------------------

عصفور المدينة

اكيد لما يكون السببين مرتبطين ببعض مفيش اى حد هيفكر انه يدخل الجيش

انما حقيقى الواحد بيحزن ان يكون ده حال الجيش

-----------------------------------

اخت مسلمة

منورانى كتيييير ,ووحشانى

لا طبعا انا لا اتفق معاكى انه مش بيتعلم حاجة من الجيش .

وصدقينى اسألى اى شاب دخل الجيش .. وقوليلوا اتعلمت ايه من الجيش بغض النظر عن سلبياته


وبالنسبة لميلى موجود فى البروفيل

-----------------------------------

الطائر الحزين

انا اتفق معاك ان ده نظام الجيش السيئة فقط تعم

لكن زى ما قلت اللى انت استفدته حاجة كويسة

-----------------------------------

محمد عبد الجليل

اكيد طبعا زى ما قلت قبل كده ان كل حاجة وليها سلبياتها

فخلينا دايما نبص على الايجابيات

وبالنسبة لموضوع اللى مدخلش الجيش ... افتكر بالنسبة للموضوع ده

ان الامهات دايما لما يكون عندها شباب ومغلبينهم يدعوا ويقولوا يا رب يدخل الجيش عشان يتربى ...

تفتكروا ده صحيح

-----------------------------------

آلام وآمال

فكرتنى بموضوع المساواة

اصل فيه بنات كتير تتمنى ان يكون فيه جيش للبنات فى مصر .

عشان نفسهم يدخلوا الجيش

-----------------------------------

خبيب

هتكلم عن المرمطة تانى وهقول يا جماعة المرمطة موجودة فى كل اقسام البوليس وفى التعامل مع معظم ضباط الشرطة

ولا احنا مش بنسمع عن اللى بيحصل

-----------------------------------

احمد الهادى

اهلا وسهلا بحضرتك فى المدونة

اكيد مفيش حد يحب حاجة زى كده ..

بس اكيد برضوا من حقى اسأل السؤال ده -_-

-----------------------------------

ابن عمر

اهلا وسهلا بحضرتك فى المدونة

اكيد طبعا مش عدل

لكن حضرتك بتبص من وجهة نظر حضرتك

وعلى حالة حضرتك بس

ما يااما فيه شباب بيضيعوا بالعشر سنين من حياتهم فى الضياع والفراغ

يعنى على الاقل حضرتك الـ 11 سنة مش ضايعين انما اكيد حضرتك مستفيد منهم وبتتعلم منهم كتير وبتمر بتجارب فيهم كتير برضوا

محمود يقول...

السلام عليكم
اختنا الكريمة سأتكلم من واقع تجربتي
انا شاب متخرج حديثا من كلية الهندسة قسم اتصالات جامعة القاهرة
بعد خمس سنوات من العمل الشاق سوف ادخل الجيش لا مانع لدي اطلاقا..لكن اولا لن يتم الاستفادة بدراستي اطلاقا داخل الجيش...داخل الجيش الواسطة هي مفتاح كل شيء بدء من الاجازات و حتى توزيع السلاح...بعد دراسة الاتصالات وهو مجال هام جدا لا استفيد به اطلاقا داخل الجيش حيث يتم التعامل معي على انني اؤدي خدمة مؤقتة و سأخرج و بالتالي لا يجب ان اكون في سلاح له وضعه ...بعد الخروج من الجيش لا اكون قد اكتسبت اي خبرة و لا اكون حديث التخرج و هي شروط العمل الان في اي شركة بالاضافة ان البعد عن ممارسة التخصص المهني سيجعلك تنسين ما درست......حينما يرفض ابو الفتاة التي تريد الارتباط بها ان يزوجك ابنته لانك لم تبدأ حياتك العملية بعد و أمامك عام كامل او ثلاث اعوام داخل الجيش...
و اخيرا كنت دائوا اتعجب ممن لا يريد اداء الخدمة العسكرية داخل الجيش حتى مررت بهذه التجربة و بالتأكيد هناك من هو مدلع و مش عاوز يدخل عشان ما يتعبش بس..

الفقيرة إلى الله أم البنات يقول...

لم يعد هناك سبب يجعلهم يريدون ان يدخلوا الجيش او على الأقل يرضخوا ويستسلموا
سيحاربوا ممممن ومع من ولحساب من
البلد لم تعد بلدهم اصبحت بلد اصحاب النفوذ
حسبنا الله ونعم الوكيل

3abdo me7tas يقول...

الإجابة بسيطة خالص أنا كاتب موضوع عن الجيش مواضيع عن الجيش من تجربتى يعنى
مش هقول انى ندمان انى محاولتش أخرج منه
بس أنا إتعلمت كتير منه
بس اللى إتعلمته أقل من اللى كان بيحصلنا

الحمد لله يقول...

سيبك من السؤال انا مش عايز ادخل الجيش ليه.. لان كل الناس ردت وقالت وانا هدخل الجيش اعمل ايه؟؟ ابقى عاطل لمده سنتين ولا تلاتة واخرج نسيت كل اللى درسته


انا بس عايز اسال السؤال بس بطريقة معكوسة.. هو الجيش بتاعنا من ساعة حرب 73 ما خلصت بيعمل ايه؟؟؟ حد يقولى بصراحة... طب هو وظيفة الجيش انه يدافع عن البلد.. طب من زمان ومفيش حرب.. ياما نلغى الجيش ياما يعمل حاجة.. يعنى ايه الجيش قاعد بقاله اكتر من 34 سنة مش عارف يشيل الالغام؟؟ ولا مش عارف يمد ترعة ويزرع كام فدان؟؟ ولا يبنى مصنعين؟؟ ايه التهريج ده, هو الجيش وال2 مليون بنى ادم اللى فيه-على حد علمى انهم 2 مليون- وظيفتهم فى الحياة صفا وانتباه؟؟؟

غير معرف يقول...

والله الموضوع فعلا بقى بشع
لو ليكي أخ دخل جيش خلليه يحكيلك
وأنا بقول أخ مش أب لأن الأب لو دخل جيش أيامه كان أحلى من أيامنا
لسبب
إن ساعتها كان الجيش ليه أسبابه وهي حماية الوطن
الجيش دلوقتي لإهانة الوطن
بطرق كتيرة قوي
يحكيلك عنها واحد مجرب
أنا سمعت حكاوي كتيرة عن اللي بيحصل في التدريب بس قبل الجيش نفسه
وعموما شكرا لطرحك الموضوع