تاج وصلنى من بنات افكارى








قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟


قلت اختار عصر الملك فاروق ... اشمعنى ... عشان كان عصر الانجليز ومحاربة المحتل .... يمكن ربنا ساعتها كان كتبلى شهادة ... اصلى عايزة اموت شهيدة ان شاء الله


أول أولوية فى حياتك عيلتك ولا شغلك ولا اصحابك؟

والله الاولوية دى بتتحدد على حسب الموقف اللى انا فيه



وكل موقف بظروفه واولوياته


ايه أكتر حاجة بتحبها فى رمضان ؟



جو رمضان وروحانياته ورقة القلب فيه


اوصف أجمل فطار ممكن تفطره؟


سواء فطار فى يوم عادى او فى رمضان ... لما الفطار بيكون مع لمة بحبها اياً كان الاكل ايه ... بيكون اجمل فطار فطرته فى حياتى


لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟


مممممممممممم ... انا مش هاخد السؤال بمعناه الحرفى

انما هجاب عليه على اساس انى ممكن اكون حاكمة فى فترة من الزمن على اخواتى الاصغر منى فى حالة غياب بابا وماما او سفرهم

واقدر اقولك انى مش هكون عادلة لان هنا مش بتكون بقواعد واحد اتنين

لانه بتحكمها العلاقات الانسانية ورصيد كل واحد

مين أكتر اعلامى مصرى بتحترمه ؟


لا حقيقى الاعلام المصرى بدأ يكون فيه نوع من التطور وان كان بسيط

وده من ناحية تعاطيه مع قضايا الفساد فى البلد

وفيه اعلاميين كويسين منهم منى الشاذلى صاحبة برنامج العاشرة مساءا

ومحمود سعد فى برنامج البيت بيتك


لو ممكن تشتغل شغلانة تانية كنت تتمنى تبقى ايه ؟؟

شغلانة تانية ... شغلانة تانية
مدرسة فى حضانة اطفال

ايه تانى بلد تتمنى تعيش فيها بعد مصر ؟؟

مش محتاجة انك تسألينى السعودية طبعا

عشان املى عينى كل يوم بيت الله الحرام

اوصف ترتيبات اجمل فرح ممكن تحضره ؟

هوه انا هقولك على ترتيبات فرح جميل خالص انا حضرته

كان فى سمالوط فى المنيا واجمل ما فى الفرح كان الزفة يا بنتى

واحنا فى الزفة اللى هيا قبل من الكوافير للنادى

الموضوع كان عامل زى ما يكون مظاهرة مش فرح

كان الصف الاول شابين ماسكين لافتة تهنئة من الاخوان المسلمين بالعروسين

ووراهم على طول اشبال كتييير قوى وماسكين بالونات بس طبعا منظمين فى صفوف

ووراهم الشباب والرجال وكانوا كتيير

وبعديهم عربية نص نقل وكان فيها سماعات وميكروفون وكان اخو العروسة مغنى فى فرقة

فكان ماسك المايك وعامل يغنى وشباب تانى معاه بيضربوا بالدف

ووراهم بقى العربيات

اللمة دى فضلت ماشية ولفت البلد لحد ما وصلنا عند طريق العربيات وخلصت

ورحنا بعد كده النادى

وكان عند البنات عاملين صفين وكل واحدة منهم ماسكة اطواق مزوقنهم

بس كده وبعدين الفرح بدأ عادى

حقيقى الفرح ده عمرى ما هنساه

يلا عقبال فرحك كده وانا اعملك اجمد ترتيب ليه

بس انتى انوى بس

بتراعى كلام الناس والقيل والقال ؟؟ ولو اه او لا قول ليه ؟

بصى يا قمر

عمر ما كلام الناس هيثبت على حال ولا هيخلص

وانا مش ناوية يجيلى الضغط بدرى

بس


صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟

هيا طبعا السعادة مش هتكون مطلقة

انما اقدر اقولك ان وقت كتير منى هيضيع

وناس كتير ممكن ما تلاقينيش

وانا برضوا ممكن ما الاقيش ناس اكون محتاجاهم

وناس مسافرة مش هسمع صوتها ولا اشوفهم

السعادة هى ..؟

حقيقى ردك على السؤال ده جميل عشان كده هستعير ردك

قيل للسعادة اين تسكنين؟...................................قالت فى قلوب الراضين
قيل فبما تتغذين؟.......................................قالت من قوة ايمانهم
قيل بما تدومين؟.......................................قالت بحسن تدبيرهم
قيل فبما تستجلبين؟..............قالت ان تعلم النفس ان لن يصيبها الا ماكتب الله لها
قيل فبما ترحلين؟................قالت بالطمع بعد القناعة
وبالحرص بعد السماحة وبالهم بعد السرور وبالشك بعد اليقين

عندك أمل ؟ اسبابك ؟

اكيد طبعا

يعنى لو الامل ضاع منك يبقى انتى ضعتى

لما بتحب تهرب من كل شئ بتروح فين ؟؟

كان الاول بروح عند صديقة ليا انتيمتى

لكن هيا حاليا مسافرة خارج مصر (يارب ترجع بالسلامة)ـ

فبالتالى ممكن اخرج اتمشى على الكورنيش او ادخل انام

امتى اول مرة خدت فيها نفس طويل وقلت ياااه انا فعلا كبرت ؟؟

مريت بازمة وحليتها لوحدى من غير تدخل حد من العائلة

حسيت ساعتها انى ممكن اعتمد على نفسى ويعتمد عليا

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

لا الحمد لله

حقيقى بقول ربنا يهدى

لان اللى هما فيه وباء

بتعرف ايدك اليمين من الشمال ازاى ؟؟

ايدى اليمين على اليمين

والشمال على الشمال

ايه اكتر الة موسيقية بتحبها ؟

مفيش

فى رأيك ليه الذوق والنخوة اتعدموا ؟

هو ممكن تسألى ليه قلوا

لان انا بحس ان دايما العادات السيئة تكتسب سريعا عن العادات الحسنة

والشعب بيتعلم من بعضه

ايه الحاجة اللى لو حصلت لك حتبقى سعيد اوى ؟

انى اسافر

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

كام عمارة

عشان كنت أأجرهم باسعار مخفضة عشان احل ازمة الشقة للخطاب

وبالمرة نخفف الازمة السكانية

البحر ولا النيل ؟

هوه مينفعش الاتنين

كل واحد وليه وقته

مركب ولا طيارة ؟

مركب

مجنون ولا عاقل ؟

مجاقل

تقرا كتاب ولا تتفرج على فيلم ؟

على حسب موضوع الكتاب وموضوع الفيلم

تمرر التاج ده لمين ؟

اخيرا وصلت للاخر

امرره لـ

حور الجنة

my finger print

بيجاسوس المصرى

ايه اللى بيحصل

كدا وبتاع

خبيب

بحب الحرية

حائر فى دنيا الله

مللت الصمت

وشرفك يا بلدى سحابة وتعدى

حياتنا كلمات

جميلة بو حريد

دعوة لن تموت

احلى ما فى الدنيا

10 شاركونى:

الأستاذ يقول...

السلام عليكم
كويس إني أول تعليق بما إنها أول زيارة لي
التاج ده بيفكرني بذكرى من كام بوست كدة لأنه كان جالي قبل كدة ,مبروك على التاج وإجاباتك طبعاً جميلة ودي بتبقى حاجات شخصية جاية من الشخصية يعني مش من الأسرار أو كدة
لكن أكتر حاجة عجبتني "مجاقل" دي حلوة أوي
مع أطيب تمنياتي بالحفاظ على حالة التوازن دي علطول إن شاء الله لأنها مفيدة ومهمة
تحياتي

آلام وآمال يقول...

عجبتني اوي حكاية ان يبقى عندك كام عمارة دي

الله يخليكي لما ربنا يكرمك ابقي اديني العنوان عشان احجز شقة
:D

تقبلي تحيتي وتقديري

عصفور المدينة يقول...

حلو التاج وجميلة إجاباتك
وجميل الإعلان لبنتنا بنات أفكاري

ولكن الإعلاميين محتاجين مزيد من التقييم

حائر في دنيا الله يقول...

جميلة كل تلك الإجابات التي أحلى ما بها صدقها
وتمنياتي لك بتحقيق كل ما فيها من أحلام

وعلم وسينفذ إن شاء الله

والسلام عليكم

هاني جابر يقول...

ماشاء الله
اجابات جميلة
ربنا يباركلك
وشكرا علي تمرير التاج
وان شاء الله حتلاقي الاجابة في الايام ديه

الجمعاوي الاصيل يقول...

السلام عليكم ورحمة الله وبركاته
تاج اكثر من رائع والاجابات شافية كافية عافية رائعة وان دلت فتدل على شخصية كاتبها
بارك الله فيك ورزقك ما تريدين وان شاء الله بحجز شقة في العمارات بتاعت حضرتك انت عارفة بقى مشكلة الاسكان
صاحب مدونة ميخا

بنت مصر يقول...

بصي سيبيلي شقه في الكام عمارة اللي عندك ما احنا مدونين زي بعض
ان شاء الله هرد على التاج في اقرب وقت
تحياتي

أميرة محمد محمد محمد يقول...

ردود رائعه بس ايه الفرح التحفه ده بجد يهبل و مايتنساش عقبال فرحك

خبيب يقول...

جزاكم الله خيرا على تمرير الأسئلة

والإجابات مقتنعة جدا

خصوصا : طريقة معرفة الايد اليمين من الشمال

سهلة وبسيطة !!

بنت أبيها يقول...

الاستاذ

مشكور على المرور والتعليق

متشكرة .... وآآآآآمين

-----------------------------------

آلام وآمال

بس كده

اول ما يوصلواهبعتلك العنوان دايركت

-----------------------------------

عصفورالمدينة

اهلا وسهلا بحضرتك

ليك فترة كنت غايب عن المدونة

ادعيلنا

-----------------------------------

حائر فى دنيا الله

وعليكم السلام

وجزاك الله خيرا على قبوله

-----------------------------------

هانى جابر

اهلا وسهلا بيك فى المدونة

العفو

-----------------------------------

الجمعاوى الاصيل

اهلا وسهلا بحضرتك

جزاك الله خيرا

شكل الناس كلها مظبطة نفسها على الكام عمارة

ادعوا بس انهم يجوا وانا اظبطكم

-----------------------------------

بنت مصر

اكيد طبعا وشقتك هتكون جنب شقتى عشان ازهقك كل يوم

وحلوة اجاباتك على التاج

-----------------------------------

اميرة محمد

منورانى يا باشا

اكيد طبعا ميتنسيش

يلا عقبال فرحك

-----------------------------------

خبيب

جزانا واياكم يا فندم