يا ترى فكرتوا قبل كده

متر الجنة بكام؟

على ذكر ازمة غلاء الاراضي ... وسعي الناس انها تشتري امتار لبنائها..


ويا ترى في رمضان هنشتري كام متر في الجنة؟؟

يا ترى فكرتوا تشتروا كام متر في الجنة؟



متنسوناش في دعائكم ....



-------------------------------------------------------------

خارج الإيطار

معتاد في بيتنا التليفزيون ده يغلق بالحديد مع بدء أول رمضان

فمن يوم فطرنا عند جدتي ... وكان التليفزيون شغال واحنا بنفطر

طبعا اخدت صدمتين ...واحدة قاتلة ... وواحدة جميلة

الاولى ... اني لاقيت بعد الأذان ومدفع الإفطار المفروض ايه يكون دعاء الشيخ الشعراوي (دعاء الإفطار)

لكن اللى لاقيته وخلاني اتنح ان (هند صبري) هيا اللى بتقول (دعاء الإفطار) وايه التقوى والإيمان في صوتها وهيا بتقوله ... بجد انا تنحت لدرجة ان ماما اخدت بالها ... وقولتلها شايفه الاستهزاء بعقول الناس

التانية ... كان فيه اعلان بجد عجبني جداً .. بس مضيعش صدمتي الاولى خالص

كان بيتكلم عن الفشخرة والمنظرة اللى بتحصل في البيوت المصرية ... وان الاسرة المصرية بتصرف في رمضان اضعاف ما بيكفيها في السنة كلها

وفي ختام الاعلان ... كلمة كانت جميلة بس للاسف مش متذكراها بالحرف انما كان معناها ان بواقي الاكل اللى بتترمي في رمضان بعد العزومات والذي منه ... فيه اسر كتير مش لاقيه نصه

طبعاً كانت صدمتي في ده ... اني مش معتادة من التليفزيون المصري وجود إعلانات هادفة بالشكل ده


ودمتم مغفور ذنبكم معتوقين من النار


تدوينتي الخاصة برمضان الماضي

13 شاركونى:

حبارير يقول...

يا فندم ربنا يبارك فيك

بجد كلمة طيبة جدا وجميلة

لو كلنا نفكر كدة؟

ربنا يرضى عنك

سعيد أني أول تعليق

وسعيد بهذه التدوينة

وأشكرك على زيارة مدونتي

أخوك حبارير

صاحب المضيفة يقول...

وكم في مصر من المضحكات المبكيات

رحم الله أجدادنا فعلا


تحياتي

أنا حر يقول...

كل سنة وانت طيبة
مش المفروض اننا نتضايق او نحس انهم بيستهبلونا لان الممثلين دول على فكرة ناس زينا بيدعوا ربا وفيهم ناس بتصلي وناس كمان بتروح تعمل حج وعمرة بغض النظر عن طبيعة شغلهم ووجهة نظرهم في شغلهم المهم انك متتصدميش ولا حاجة
:)
تاني حاجة انا كمان عجبني جدا حملة اعلانات التوعية اللي شغالة الايام دي بس يارب تجيب نتيجة
رمضان كريم
تحياتي

Eman يقول...

حاجة تغيظ والله حتى الدعاء بيفقد هيبتو في النفس

بتحسي ان في كذبة في الموضوع زي ما تصلي ورا امام وانت مقتنع ان ماينفع يكون امام

بعد اذنك يابنت ابيها

وبعد اذنك ياصاحب المضيفة

نقول وكم في ((العالم الاسلامي)) من المضحكات المبكيات

ربنا يلطف بينا

TIMMY !! يقول...

السلام عليكم ..

و كل عام أنتِ بخير ..

هي الجنة مش رخيصة برضه .. لكنها سهلة المنال ..
فكما قال رسول الله : "من خاف أدلج و من أدلج بلغ المنزل , ألا إن سلعة الله غالية , ألا إن سلعة الله الجنة"

أدلج : عمل بالليل , لأن العمل ليلا أشد وطئا و تأثيرا في القلب و أسرع إلى القلب من العمل نهارا كما أن المسافر يقطع بالليل ما لا يقطعه بالنهار ..

-------------

أما بالنسبة لما هو خارج الإطار ..


فبجد حاجة تكسف .

أنا مش بتفرج صراحة على التلفزيون غير ساعة الفطار .. و مش بتفرج غير على دبي علشان "سوبر هنيدي" :) ..

بس في أ,ل يوم رمضان شفت المصري و لاحظت الست بعد الآذان ... بلمت برضه و اتأكدت إنه صوت "حريمي" !!!

أمال الرجالة خلصوا و لا ايه ؟؟

المهم و أنا على دبي في سوبر هنيدي بيجيبوا فواصل برضه فيها إعلانات و أدعية برضه ...

و اتصدمت برضه لما لقيتهم جايبني دعاء مرة بصوت واحدة و صورتها و هي قاعدالك في الجامع و ماسكة سبحة و قدام المصحف !!!

بصراحة الواحد لو ما كانش في رمضان كان المفروض يـ....

و لا بلاش .. هي بايظة بايظة ..

من امتى يعني و التلفزيون بيجيب حاجة نافعة ؟؟

و آسف جدا على الإطالة ..

فزلوكة يقول...

كل سنةوانتى طيبة يا جميل

احنا كمان بنلغى التلفزيون فى رمضان
بس مش نهائى يعنى عشان برامج معينة

اما هند صبى
فإيه يعنى هتشككى فى نوايا الناس كمان
الشيخ الشعراوى خلاص بقى حاجة قديمة
عايزين تطور

ناس رجعية بصحيح
d:

أُكتب بالرصاص يقول...

كل عام وانت بخير

تعرفي أفضل شيء عملته في رمضان دا
حذفت كل قنوات التليفزوين
وماكنتش متصور أني هاقدر

لاكن
تتصوري
قدرت
:)

بيجاسوس المصرى يقول...

اولا كل سنة و انتى طيبة يا بنت ابيها و شكرا على سؤالك الدائم
ثانيا ان شاء الله سوف احل الواجب
ثالثا بلاش اسمع حكاية مدام فنزرة و جوزها العبيط لانه بيجبلى عصبى و كنت هكسر التليفزيون بسببه

بس خلاص

قلب أبيــض يقول...

السلام عليكم

لديك رسالة من يتيم
على قلب ابيض

نتمنى منكم المشاهدة .. والنقد البناااء

تحياتى ..

eman alaa eldin يقول...

جزاكى الله خير ع البوست الرائع دة
وع فكرة الاعلانات قليل جدا لما تلاقى حاجة زى اللى انتى شفتيها دى

وكل سنة وانتى طيبة
بجد بوستك دة كنت محتجاه جدا

موناليزا يقول...

تقبل الله منا ومنكم صالح الاعمال
وكل سنة وانتى طيبة ويارب يكون عيد سعيد علينا جميعا

موناليزا يقول...

تقبل الله منا ومنكم صالح الاعمال
وكل سنة وانتى طيبة ويارب يكون عيد سعيد علينا جميعا

بنت أبيها يقول...

حبابر ـ السعادة ـ انطلاقة

منور المدونة من تاني يا فندم

اهلا بحضرتك

--------------------------------------

صاحب المضيفة

فعلا

مشكور ع المرور والتعليق يا فندم

--------------------------------------

انا حر

وانت طيب

انا مش متفقة مع كلام حضرتك

جميل انهم يكونوا بيصلوا ويعملوا حج وعمرة ربنا يهدي

لكن انهم يجيوا في التليفزيون على انهم متقيين وواعظين ..... مينفعش

لان دي ليها ناسها

وحاجة محتاجة ناس تكون قدوة لينا ولشباب الجيل ده

بس

وتحياتي لمرورك

------------------------------------

eman

كيفيك يا ميمو

كل سنة وانتي طيبة

فعلا كلامك صحيح

كل حاجة بيخلوا هيبتها تسقط في قلوب الناس

------------------------------------

timmy

يا هلا بحضرتك من جديد

اكيد طبعا

انما الاعمال اللى بتوصلك ليها بتكون دايما ثقيلة على النفس والناس بتستصعبها

على الرغم انها بسيطة جدا

انما نقول ايه

ربنا يهدي


ياه كمان ... ده الموضوع مقصود بقى

عارفين انه مش بيجيب حاجة عدلة

انما كده بدأوا يخبطوا جامد بجد

والمشكلة ان الناس سكتم بكتم

ده اللى يغيظ

وكأن الناس اصبح لدينها تأقلم مع اي حاجة

واي حاجة في اي حاجة

------------------------------------

فزلوكة

وانتي طيبة يا حبيبتي

ربنا يتقبل منا ومنكي رمضان

منورة

صحيح فعلا

كله كوم والنوايا دي كوم تاني

:)

------------------------------------

اكتب بالرصاص

منور يا فندم

بجد فرحت ان حضرتك قدرت تعمل كده

عقبال ما الكل يقدر يعمل

كل عام وانت بخير

------------------------------------

بيجاسوس المصري

وانت بخير

اخيرا خرجت من الشرنقة اللى انت فيها

ههههههههههههههههههههههههه

وتكسره ليه ... اكيد طبعا الاعلان فيه سلبيات وانا معاك ... وبيوصل رسائل من تحت لتحت

ان الشعب هوه السبب في غلاء الاسعار وبايده انه يغير ده

لكن عجبني فكرة التبذير في رمضان


فكرة لكن لسه مكملتش

لكن عجبتني

------------------------------------

قلب ابيض

وعليكم السلام


اهلا وسهلا بحضرتك يا فندم

زورنا المدونة وشوفنا الرسالة

ربنا يكرمك

------------------------------------

ايمان بنت الحرية

يا هلا وغلا بيكي يا عثل

جزانا واياكي اي جميل

صحيح فعلا

اتمنى بجد اني قدرت افيدك بحاجة

------------------------------------

موناليزا

منا ومنكي يا رب

ربنا يكرمك يا جميل

اسعدتني زيارتك