تحديث

الموضوع نزل على شخابيط روحوا شوفوه

http://shkhbat.blogspot.com/2008/05/blog-post.html

----------------------------------------------------------------------

حديث سابق بفترة عن اليوم


بنات افكاري : ها كنتى بتقولي انك هتعملي موضوع عن الكورنيش على شخابيط

بنت ابيها : اة بس اللى مخليني مأجله الموضوع اني لسه مش متوفر تحت ايدي كاميرا .. وانا من النوع اللى بيكتب الموضوع بعد الصور .. لانها هيا اللى بتديني ايحاء للموضوع

بنات افكاري : بس كده طيب انا هوفرلك الكاميرا

بنت ابيها : يا سلام الواحد مش عارف يودي جمايلك فين بس

وتم تحديد الميعاد مرتين وفي المرتين الظروف مسمحتش اني اشوفها مرة كان بسببي ومرة كان بسببها .. وفي المرة التالتة الحمد لله كانت تابتة :)

روحنا الكورنيش واليوم كان جميل جداً والشمس كانت مكسوفة ومستخبية ورا السحاب والهوا اكثر من روعة

بدأنا في التصوير ولما عدينا بتاع تلت الممشى لاقينا اتنين ضباط وعاملين حملة على اللى في الكورنيش من شباب

نظام هات بطاقتك وكده

وخصوصا الثنائيات الموجودة وخصوصا ان الساعة كانت 1.5 يعنى مش وقت خروج ولا ناس تتفسح

بس تقولوا ايه بقى

وبعدين احنا ماشيين عمالين نصور

وفرحانين بكارت الارهاب اللى -الضباط وواحد معاهم لابس ميري عاملينه

ولقطنة كام صورة ليهم وهما بيعملوا كده

وبعدين أخر واحد اخد منهم كام قفا وتلطيش محترمين

وصورنا صورة ومحدش خاد باله

وبعدين جنا طالعين من الكورنيش

والطمع جاب معانا وحبينا نصور صورة واحنا من برة

قام ضابط منهم شافنا وقال لواحد كان معاهم تقريبا كان مخبر

راح جري جه قالنا تعالوا كلموا الباشا عايزككم

انا قلت خلاص الصور اللى لاقطناها عليه العوض عليها .. واتمنيت ساعتها اننا نكون صبيان عشان كنا نعرف نجري ( مش خوف انما عشان نحافظ على الصور اللى لاقطناها)

المهم روحنالهم وكنت لابسة نظارة شمس رحت خلعتها لزوم الاحترام

واحد منهم قالي : ممكن الموبايل يا آنسة لو سمحتي

رديت عليه : ممكن اعرف ليه ؟

وكما توقعت مش بيرد على السؤال : ممكن الموبايل (من غير لو سمحتي)


وبعدين لاقيته هيتضايق وممكن يتصرف تصرف عنيف رحت عطهوله .. معرفش يوصل للصور سألني على مكانها وريتهومله

وقعد يقلب في الصور

وفي اثناء كده الضابط التاني سألني

انتوا منين

ريت قلتله : من بني سويف

بتدرسي ايه

انا خلصت

بتشتغلي

حاليا لا


وفي الجو ده حبيت نستغله حبه

رحت قلت : بس على فكرة احنا معجبين جداً باللى انتوا بتعملوه

اللى ندهنا ليهم مكانش مصدق اللى بنقوله : يعنى انتوا مبسوطين من اللى بنعمله

قلتله بصدق : اة طبعا فرحانين جداً كمان

الواحد كان بيعدي على الكورنيش كان بيشوف مناظر بيتأذى منها ويمكن اللى موجدين النهاردة وفي اوضاع جلوسهم محترمين عن مناظر تانية شوفناها قبل كده وياريت تستمروا في كده بجد

راح رد عليا : طول ما الباشا معانا هنضفها اول بأول

طبعا ابتسمت في نفسي على التعليق ده

المهم في الوقت ده كان وصل للصورة اللى ظاهر فيها القفا اللى عطاه للشاب .. وهنا بقى حسيت انى كان بيجز على سنانة وكأنه بيقول لولا انكم بنات .. وراح موريهم للضابط التاني اللى معاه

وفي وسط الحديث اللي كان شغال قلنالهم اننا كنا جايين نعمل موضوع صحفي عن الكورنيش لانه بجد اجمل منطقة في بني سويف وكان سألنا تبع انهي جريدة قلناله لا ده على النت

راح المخبر اللى كان معاهم ضحك وقال : كمان على النت .. طلعوني منها انا

فرديت عليهم : الموضوع مفيهوش اي اذية ليكم .. لان مفيش اي ملامح صور ظاهرة في الصور لاننا كنا بنصور من بعيد وحضرتك لو فيه اي صورة مش عاجبة وحضرتك وحاسس انها هتضرك امسحها مفيش اي مشكلة (آل يعنى هوه مكانش هيعمل كده .. بس نظام الواحد حب يكون ذوق ودبلوماسي)

وبعدين لاقيت واحد مش عارفة جه امتى واحنا واقفين راح قايل : يعنى الموبايل دلوقتي ممكن نرميه هووووب في النيل (بس باسلوب هزار)

راحت بنات افكاري ردت عليه : فداكم ولا يهمك

زى ما تقولوا اتكسف راح مبتسم وساكت

واخدنا الموبايل وقلنالهم احنا متأسفين ان كنا سببنا ليكم اي ازعاج ورحنا ماشيين من عندهم

وبعدين كملنا شغلنا من حيث التصوير وسؤال المسؤلين عن الكورنيش عن معلومات عنه وكده

وبعدين ركبنا تاكسي وروحنا وكنت نزلت قبل بنات افكاري .. فبعدين لما روحت وكلمتها ع الماسنجر

لاقتها بتقولي : اسكتي شوفت حتة منظر وانا فى التاكس بعد ماسيبتيني

قلتها : ايه ؟؟

شوفت ياستي امين الشرطة الرخم فى عربية البوكس من غير التاني وواخد اربع شباب من ورا وبنتين من قدام معاهم بس البنتين كانت حالتهم صعبة وعمالين يتحايلو عليه

-----------------------------------------------------------------------------

اسيبكم بقى مع صورتين شكلهم ما خادوش بالهم منها

وتبقوا تشوفوا الموضوع قريبا على شخابيط سويفية



11 شاركونى:

Fahd يقول...

شوقتينا للصور

هي فين

مشروع انسان يقول...

جميل

ومنتظرين باقى الصور

اعتقد قريبا هيلغوا الموبايلات دى من البلد
:)

جيبالهم مصايب

بس لو بجد هما بينضفوا الكورنيش من الشباب والبنات ووقفهم مع بعض
يبقوا ناس كويسة

عايزين منهم فى القاهرة
بس هنا هيتعبوا اوى
:)

هيضربوهم بالنار عشان يخلصوا

ربنا يهدى

Unknown يقول...

:)

بجد موقف تحفــــه

مقولتليش ليه يا وحشه كنت جيت معاكم اصور...بدل ماانا قاعده اصور في اى حاجه....دا انا قربت اصور الدبان :)

لا بس بجد ماشاء الله عليكى احسنتى التصرف...ينفع يتثبتوا بسهوله على فكره
:)

تواشيح سياسية يقول...

فييييين باقى الصور

الواحد بيفرح فى الفضائح
ههههههههههههههههه

موناليزا يقول...

كويس ان بفى فيه حد مهتم بالمهزلة اللى بتحصل

بنت أبيها يقول...

fahd

انهي صور بالضبط

عموما الموضوع نزلته على شخابيط

واهلا وسهلا بيك في اول زيارة للمدونة

-----------------------------------

امام الجيل


(:

يا رب

-----------------------------------

حطم القيود

فعلا يا قمر تحفة واي تحفة

يا حبيبتي ساعتك مشغولة بمذاكرة وامتحانات والجو ده ... مجاليش قلب صراحة اني اقولك

يلا يا عثل خيرها في غيرها .. وعلى راي المثل الجيات اكتر من الريحات

بس انا الاقيكي

(:

-----------------------------------

انا مش سلبي

(:

صور الموضوع بتاع الضباط يعني

لا ما باقي الصور مسحوها .. كويس انهم مخدوش بالهم من الصورتين دول

انما الصور الخاصة بموضوع الكورنيش نزلت على الشخابيط ممكن تروح تشوف الموضوع

-----------------------------------

monaliza

يا هلا بيكي يا سكر في المدونة

فعلا كويس جداً

بس يا رب متكونش مرة جات غلط ولا حاجة

اتمنى فعلا انهم يعملوا حملات من وقت للتاني

محمد عـنـانـى يقول...

ارفع قبعتى احترام لكم لانكم فعلتو ما ينبغى فعله فتحيتى لكم
ولكى تتم العمل انشرو هذه المغامره بين اخواتكم واجعلو منها مبادره لنشر ثقافه التدوين والتصوير والاخراج
فانى دائما ارى ان الاخوات هم كنز الدعوه ولكن للاسف هم مهمشون فانتم تستحقو التقدير
تحياتى

Barrak يقول...

انا رحت لشخابيط وشفت الصور
وقلت حزبط دماغي هنا
وبالمره أسلم




اشكرك

Mohamed Abdelgeleel يقول...

حصل معايا قبل كدا في انتخابات نقابة الصحفيين وجالي عسكري قالي كلم الباشا قولتله انا مش شايف بشوات قالي تعالي بس وروحت معاه لاتنين ظباط قاعدين واحد منهم قالي انت بتعمل ايه قولتله بصور الامن والامان الي انتوا بتنفذووه في الانتخابات قالي يا سلام هو انتوا بتكتبوا علينا حاجة عدله قولتله هو احنا عايزين ايه غير الحاجات كلها تبقي عدله قالي طب امسح الصور الي صورتها قولتله لا لحد كدا وملكش حق بقي قام باصصلي كدا وقالي انا لحد دلوقتي بتكلم بالراحه قولتله تتمسح يا باشا تتمسح ههههههه لا طبعا مقوتلهوش كدا
قولتله انا حمسح الصور الي مبينة اشخاص معينة لكن حسيب الصور الي مصورة عربيات امن مركزي مثلا حاجات كدا قالي ماشي ومسحت الصور ومشيت

بنت أبيها يقول...

محمد عناني

سعدت بالزيارة ... والتشجيع

ولا تزال الدعوة للتدوين معنا في الشخابيط مفتوحة

-------------------------------------

barrak

يا هلا بحضرتك

العفو

وسلامي لاهل الكويت

-------------------------------------

محمد عبد الجليل

شرفتنا بالزيارة والتعليق

فعلا اي شخص بيشتغل في الامن عنده زي انذار لما اي مواطن يتعامل معاه

وكأنما يريدون بهم السئ دائما

Safwat Rabea يقول...

على فكره احسن حاجه انكم بنات والا كان مش هيتعامل معتكم باحترام واسالو مجرب اللى هوا انا حصل معايا(بس مش ضابط مراقب امتحانات كادر المعلمين صورتهم وهما بيغشوا) موقف مشابه واخد الموبايل بالعافيه ولما قاللى امسح الصوراخدت الموبايل وجريت