فيه عادات كده خاصة برمضان الواحد جايز بيشوفها كل رمضان دايما


ومنها العادات الكويسة ومنها العادات السيئة



انك تلاقى الشباب يلموا بعض قبل الفطار بنص ساعة او اكتر ويلعبوا كرة قدم




ان تلاقى طوابير قبل المغرب على بياع التمر الهندى والعرقسوس



مع ان السنة الافطار على لبن او تمر او ماء


انك تلاقى الاطفال والكبار بيتجمعوا من كل حته وتروح تتفرج على المدفع وهوه بيضرب وبعدين يجروا يروحوا وهما فرحانين



انك تلاقى اكتر موسم بينشط فيه بيع الزبادى هوه رمضان




انك تلاقى الخيم الرمضانية بتنتشر فى كل مسجد

انك تلاقى السهرات الرمضانية اللى ملهاش علاقة اساسا برمضان


انك تلاقى الشباب يسهر لحد السحور فى الشارع وعلى القهاوى وبعدين يتسحر وينام


انك تلاقى العائلات يعزموا بعض


ويتلموا مع بعض على اكلة واحدة


انك تلاقى المسحراتى بيلف الشوارع وقت السحور



انك تلاقى الاطفال بعض الفطار يخرجوا للشارع

ومعاهم الفوانيس ويغنوا اغانى رمضان


والفرحة مش سايعاهم


انك تلاقى كل يوم بعد الفطار شخص يخبط عليك ويقولك "لله"ـ

انك تلاقى البيتوت متزينة والشوارع متزوقة

انك تلاقى المساجد متزينة بالانوار الجميلة



احاسيس جميلة قوى لما تتمشى فى الشارع بالليل فى رمضان


وتشوف كل الحاجات اللى بتحسسك بروعة رمضان

6 شاركونى:

أبرار يقول...

السلام عليكم ورحمه الله وبركاتة
أختى فى الله كلام حضرتك جميل بس تعرفى كنت إنهاردة بتكلم مع ماما وبقولها إنى مش حاسة بروح رمضان أة الحمد لله بنعمل كل العبادات وحاسين إن روحنيتنا بتعلى بس مش حاسين بفرحة رمضان إللى بنجدها فى الشارع المصرى كل سنة
تعرفى نزلت قبل رمضان بإسبوع علشان أشترى شوية حاجات كنت متوقعة زحمه والناس بتشترى والأطفال كالعادة بتتخانق مع أبائهم علشان الفوانيس
والناس مستعدة وبتبارك لبعضها قدوم شهر البركة لكن لم أجد هذا كلة حسيت أنى فى شهر عادى جدااا
حاسة إننا إفتقدنا القدرة على الفرحة
بارك الله فيكى أختى فى الله
ورزقك الجنة ونعيمها
أختك فى الله
أبرار

الطائر الحزين يقول...

رمضان كريم فى كل شىء
يا ليت الأمر يتعدى الشكل و يشمل المضمون و نزوق اخلاقنا ووجدانا

كل عام انت الى الله اقرب
دعواتك

Mahmoud يقول...

رمضان .. فعلا فيه مظاهر جميلة تحسس الواحد بالفرحة و التفاؤل .. و مظاهر ترجع بيه لورا و تفكره بطفولته وايام زمان أيام الفرحة الحقيقية البريئة .. وطبعا في مظاهر مخجلة مدهشة مش عارف ايه علاقتها برمضان .. ورغم ده كله أكيد أيام رمضان أيام مختلفة .. نري فيها ما يسعدنا و بالتأكيد فيه اللي يحزننا

كل سنة و أنتي طيبة
رمضان كريم

بنت أبيها يقول...

ابرار

نورتى المدونة بزيارتك

واسعدنى تعليقك

كلامك صحيح ... ويمكن ده من كثرة الذنوب .. ومن تملك الدنيا فى القلوب

ومن كثرة الصدأ والران الذى اصبح يغطى ويعمى القلوب والأبصار

كلها حاجات مشتركة تخلى الناس مش حاسة برمضان ومش فارقة معاها كتير

ومش فرحانة بقدومه

-----------------------------------

الطائر الحزين

اكيد طبعا المضمون هو الأهم

لكن فى بعض الاحيان الشكل يؤثر سواء السلب او الايجاب على المضمون

دعواتك انت كمان

-----------------------------------

mahmoud

اهلا وسهلا بحضرتك فى المدونة

ونورت التدوين كله

اكيد طبعا رمضان وعاداته فيها الكويس وفيها اللى مش كده

محمد عبدالجليل يقول...

يا رب الناس تبقي طول السنة زي ما بتكون في رمضان انا فاكر قبل رمضان كانت صلاه الفجر في المسجد كنا بنكون صفين بالعافية ما شاء الله اول يوم رمضان صلاه الفجر مكنش في مكان في الشارع للمصلين ربنا يثبتنا ويثبتهم يا رب

الغريق يقول...

بارك الله فيك أختى الكريمة

بصدق الواحد حس إحساس غير عادى أنه فعلاً فى رمضان

بس الحاجات ديه كان الواحد بيشوفها زمان أكتر من دلوقتى

علشان كنا زمان بنحب نجتمع مع بعض بعد القيام ونتسامر ونتسلى

دلوقتى الواحد مش قادر يعمل حاجه علشان مشغول بشغله والمعيشه

ربنا يبارك فيكى أختى الكريمة