بص بقى من الاول كده



لو مش عايز تتظبط قبل ما يجى رمضان

يبقى بلاش تقرأ الموضوع







طيب لو عايز تتظبط يبقى خليك معايا .. وفتح دماغك شوية



قولى الاول انت عايز تتظبط ليه



اكيد عشان تهمك نفسك ويهمك رمضان



طيب هوه رمضان بالنسبالك ايه



يلا .. معايا



هات ورقة وقلم








واكتب فيها رمضان بالنسبالى ايه





وكبرها .. وعلقها على باب الاوضة بتاعتك



علقها على سريرك




علقها على الحيطة اللى بتشوفها وانت نايم على السرير




علقها على باب الشقة اللى بتخرج منه







وعلقها من برة عشان تشوفها وانت داخل


لان ده اللى انت عايزه من رمضان



وبعدين بقى هات ورقة تانية واكتب فيها انت نفسك تكون ايه فى رمضان






وابدأ مع نفسك بالتدريج من دلوقتى





ازاى ...... هقولك





انت مثلا عايز فى رمضان تختم القرآن مرة او اتنين او اكتر






يبقى ابدأ من دلوقتى





اسأل نفسك انت بتقرأ كل يوم قرآن





لو لأ يبقى يلا بسرعة ابدأ واقرأ كل يوم حزب حزبين

وكل يوم كتر عن اليوم اللى قبله





لو أة .. يبقى شوف انت بتقرأ قد ايه كل يوم

وزود عليه حزب حزبين وكل يوم زيادة عن اللى قبله




وقيس على ده كل حاجة نفسك تعملها فى رمضان





خلاص خلصنا الورقة دى


طويب .. هتكتبها بخط حلو كده وتلزقها على باب الدولاب بتاعك .. او على المراية






وبعدين






هتعلن حالة الطوارئ عندك فى البيت





اصل مينفعش تبقى لوحدك





عشان الشيطان ميتشطرش عليك

وانت هتكون فريسة سهلة ليه وانت لوحدك





طيب وحالة الطوارئ دى هيكون شكلها ايه





هنعلق الزينة فى البيت



ونطلع الفوانيس اللى بنشيلها لرمضان



وبعدين هنحط مع بعضنا خطة هنطبقها فى رمضان نتفق عليها كلنا

يلا ابدأ فى التظبيط بسرعة

ImageChef.com

وبلاش تأجيل ... عشان خلاص مينفعش تأجل أكتر من كده


هختم بكلمة للإمام الشافعى رحمه الله بيقول

طلبنا ترك الذنوب فوجدناه بصلاة الضحى
وطلبنا ضياء القبور فوجدناه في قراءة القرآن
وطلبنا عبور الصراط فوجدناه في الصوم والصدقة
وطلبنا ظل العرش فوجدناه في محبة الصالحين
يارب اجعلني ممن لايحب الا فيك، ولا يبغض الا فيك

6 شاركونى:

عصفور المدينة يقول...

حاضر حاضر بس ما تشخطيش
:)
أوعى حد يسمع كلامها ويعلق الورقة من دلوقت أحسن يتعود على شكلها وتبقى عادي اكتبها وخططها وابدأ الاستعداد وبعدين علقها من أول يوم
ولا اقولك علقها من دلوقت أصل هو كله عمرنا رمضان وغيره
:)
بارك الله فيك الصور رائعة أيضا

غير معرف يقول...

أكتر حاجة بتأثر فيا اليومين دول

لا للتسويف

فعلا محدش ضامن عمره ورمضان فرصة والرسول دعوة بطول العمر فقط من اجل ان يبلغه الله رمضان

نفسنا بقي في بوست عن السلبيات يعني مثلا التليفزيون او الخيم الرمضانية عشان تبقي غطيتي الموضوع اكتر


اخراج رائع للموضوع

جزاكم الله خيرا

the others يقول...

بجد موضوع حلو قوي انا هبدأ اقرا قران من دلوقتي يا رب رمضان ده نعتق فيه كلنا من النار

أميرة محمد محمد محمد يقول...

ربنا يعزك يا بنت ابيها ويجعل فيكي خير للمسلمين.بالفعل اللي عايز يعمل حاجه كويسه في رمضان ويتغير السنه دي اكتر يبقي لازم يبدأ دلوقتي لان تعويد النفس صعب.وربنا يساعدنا كلنا ونغتنم رمضان السنه دي

بنت أبيها يقول...

عصفور المدينة

هههههههههههه

حبينا نجرب اسلوب جديد

مش كلو بينفع معاه اسلوب بالراحة


-----------------------------------

مصراوى اوى

صحيح

التسويف مدمر لكل حاجة فى حياة الانسان

لا تؤجل عمل الساعة للساعة القادمة

-----------------------------------

بنت مصر

نورتينى يا قمر

وانا اقول المدونة احلوت كده ليه

ربنا يعينك ... وادعيلى

-----------------------------------

أميرة محمد

نورتيى وكترتينى يا جميل

ربنا يكرمك

صحيح تعويد النفس على حاجة مكنتش متعودة عليها صعب ... لكن اكيد مش مستحيل

بالتوفيق

الباحث عن الحقيقة يقول...

ما شاء الله لا قوة إلا بالله
بارك الله فيكم