وانا جالسة مع صديقتى وجارتى ... رن موبايلى





نظرت إلى الأسم ... وجدتها صديقة من اصدقاء الكلية


فعلمت انها ترن فقط

ثم طالت الرنة ... فتأكدت انها تريد ان تكلمنى


ــ السلام عليكم

ـ وعليكم السلام

ـ إزيك يا سمسمة عاملة ايه

ــ الحمد لله .. بقلك ايه انا عازماكى النهاردة عشان تيجى حنتى النهاردة

ــ بجد .. طيب الف مبروك يا قمر ... بس انا معرفش المكان

ــ أنا اتصلت بالشلة وعزمتهم و (... ) عارفة المكان ... لمو بعض وتعالوا


ــ خلاص ان شاء الله

ــ لازم تيجى .. مهم عندى انك تيجى

ــ انتى بتتكلمى ازاى ... ان شاء الله جاية

ــ طيب سلام عليكم


ــ وعليكم السلام


سمسمة دى بنت عرفتها فى الجامعة واتخرجت معانا السنادى ... كانت بنت عادية بس بتحب دينها قوى ... وحضرت كتب كتابها فى اجازة نص السنة


وكانت ساعتها هتموت وتعمل فرحها اسلامى .. وعملت خناقات بسبب الموضوع ده


لكن معرفتش تعمله اسلامى


المهم

اتصلت بـ ( .... ) اللى هيا عارفة البيت .. لاقيتها مش هتقدر تروح لانها مش مظبطة ظروفها من قبليها

وقعدت توصف ليا فى البيت .... لكن على مين ... ولا عرفته

اصل المنطقة اللى هيا ساكنة فيه مش بروحها كتير .. ومعرفهاش قوى


المهم اتصلت على واحدة تانية لاقيتها رايحة قلتلها انتى عارفة المكان ... قالتلى إن سمسمة قالتلها نركب تاكسى وننزل عند ( .... ) وهيا بيتها هناك وهنعرفه من الزيطة والاغانى الاسلامى


قلتلها طيب ... هعدى عليكى نروح مع بعض


قالتلى ماشى


المهم على الساعة 9 لبست ونزلت ورنيت عليها لما ركبت السرفيس


ونزلت على اول شارعها واستينها وجات



وفضلنا واقفين مستنين تاكسى


مفيش تاكسى فاضى ... قعدنا نضحك ونقول اصل البلد غنت


وبعدين قلنا مش مشكلة مش لازم تاكسى فاضى


ممكن نركب مع واحد معاه زبون جانبه واحنا نركب ورا


بس نلحق نوصل عشان نلحق نروح


وبعدين ربنا رزقنا بسواق تاكسى .. كان معاه زبون وقلناله ( ... ) قالنا ماشى


ركبنا وقعدنا نتساهر ... اصلنا كنا مشفناش بعض من زمان ... والحدث ده اللى لمنا على بعض



وبعدين طلع ان الزبون اللى راكب معانا كان رايح فى مكان بعيد عن المكان اللى احنا كنا رايحينه


يعنى سواق التاكسى لف بينا البلد


المهم وصلنا بالسلامة


وكانت الاغانى اللى شغالة فى الحنة نظام العنب والنهارده فرحى


ودخلنا من الباب لاقيناها واقفة على السلم ولابسة خمار على راسها ... وشكلها زي شكل اللى خارج من خناقة


المهم سلمنا عليها وقلنالها الف مبروك ...وبعدين سألناها فيه ايه مالك


قالت مفيش حاجة



وبعدين شافت حد طالع على السلم كانت تقريباً تعرفه


راحت مكلماها وبتقوله ايه اللى شغال ده ... وبعدين احنا ركنا على جنب مسمعناش باقى الكلام

لكن لاقيناها فتحت فى العياط ... والجدع يسكتها

رحنالها .. فيه ايه مالك يا سمسم


طلع انها زعلانه انهم قلبوا الدى جى لاغانى هابطة



وفضلوا كل اللى حواليها يسكتوا فيها


لحد ما الحمد لله اللى كانت بتكلمه ( اللى طلع انه خالها ) خلا بتوع الدى جى غيروا الاغانى وبقت اسلامية



كفاية سرد فى الحكاية لحد كده


Stop لانى فى الحتة دى عملت لنفسى

لانى بدأت احلل الموضوع


اولا طبعاً : هيا بصراحة عجبتنى جداً فى موقفها وثباتها على مبدئها انها عايزة حنتها تكون اسلامية


واللى عرفناه منها بعد كده انها عملت خناقة كبيرة قوى مع زوجها واهله عشان تخلى الفرح اسلامى ... لكن برضوا منجحتش


ثانياً : انا بصيت على الجو اللى حواليها ( ده بعد ما طلعنا من على السلم ودخلنا الشقة )ـ


لاقيت ان الكل عايز الاغانى الهابطة دى .. يعنى هيا لوحدها .. حتى من أهلها ( لكن هما مشغلين الاسلامى عشانها .. وان هيا العروسة ومش عايزين يزعلوها )ـ


يعنى بجد الواحد يسترجع ذكريات ناس تانية ملتزمة ماكانوش ثابتين على مبدأها ده زى ثباتها


حقيقى مش عارفة اقول ايه غير


بارك الله لكما وبارك عليكما .. وجمع بينكما فى خير


وربنا يوفقك ويسعدك فى حياتك يا سمسم ... زى ما انتى عايزة تبدأى حياتك على طاعته

فمتخافيش اكيد هو كمان هيساعدك انك تستمرى حياتك على طاعته

8 شاركونى:

Mohamed Abdelgeleel يقول...

عمري ما فكرت في الموضوع ده بصراحه بس انا حشغل اسلامي والي مش عاجبه مع السلامة ده فرحي

حور الجنة يقول...

ربنا يثبتنا جميعا على طاعته

بنات افكارى يقول...

السلام عليكم
جميل اوي التمسك بالمبدء وربنا يوفقها في بقيت حياتها ان شاء الله
وربنا يبارك ليهم ويبارك عليهم ويجمع بينهم في الخير اللهم امين

بنت أبيها يقول...

محمد عبد الجليل

صحيح عمرك مافكرت فيه لانه مش بيسبب ليك اى مشكلة


لان وضعك كشاب غير البنت

انت تقدر تتحكم فى ا مورك غيرها ... وغير لما يكون كمان كل اهلها مش عايزين حاجة زى كده

تحياتى

-----------------------------------

حور الجنة

منورانى ووحشاااااانى كتيييير


آآآآآمين يا قمر


-----------------------------------

بنات افكارى

آآآآآمين

حائر في دنيا الله يقول...

الثبات على المبدأ أصعب دوما من الالتزام بالملدأ ذاته، فما بالك بأمر ظن الناس أنه صار ثابتاً لديهم فإحنا رايحين فرح يعني رايحين نرقص والعنب العنب بقه

ربنا يهدي ويباركلها

مع تحياتي
السلام عليكم

بنت أبيها يقول...

حائر فى دنيا الله

كلام مضبوط

اللهم ارزقنا الثبات

Eman يقول...

ياسلاااااااااام أخيرا لقيت بلوج إسلامي وممتع... يابنتي انا أثناء بحثي في عالم المدونات اتصدمت بواقع عجيب دخلت في مدونات بتاعت ناس مريضة ((وما أكثرها!!!)) شوية شواذ- عافانا الله- وملحدين... الحمد لله على نعمة العقل والإسلام.... انت من اللحظة دي مدونة صديقة وخليكي على كدة ويااارب نسحب بعضنا لفوق ونساعد بعض بالنصيحة

Eman يقول...

بالنسبة لحنة صاحبتك انا بحييها والله على موقفا... انا والله نفسي اعمل عرسي بدون إختلاط... بس لما اناقش اي واحد بيقول لي لا طبعا واتخيلي عرسك بدون ما ابوكي يفرح بيكي وبدون العريس ما يقعد معاكي والخ الخ الخ

عموما هو لسة بدري على الموضوع دة

ربنا يهدينا ويساعدنا