تعالوا نخطط

تحديث

متنسوش ادلى بصوتك فى السؤال

-------------------------------------------------

لما بتكون رايح مصيف

مش بتخطط لكل يوم هتعمل فيه ايه

ده كمان ساعات بتخطط كل ساعة هتعمل ايه

وتقول دول كلهم كام يوم هقضيهم فى المصيف

هوه انا كل يوم بصيف

لازم استغل كل وقت وكل دقيقة فيه

طيب هوه رمضان عندنا اقل من المصيف او رحلة او معسكر بتخطط ليه

طيب هخطط وهحط ايه

اليكم بعض الاقتراحات :ـ

1- جهز 30 دعوة وكل دعوة هتكون مخصصة ليوم

يعنى اليوم كله فى كل صلواتك بتدعى الدعوة دى .

2- حدد لنفسك هتختم القرآن فى رمضان كام مرة.. وقسمه على أيام الشهر .

3- حدد لنفسك صدقة يومية .. وهتديها لمين او هتحطها فين

حتى لو ربع جنيه كل يوم ... المهم الاستمرارية .

4- حدد لنفسك 30 ذكر

بحيث كل يوم ذكر يظل لسانك يردده طوال

وتكون عارف فايدة الذكر وانت بتردده ومستشعر فائدته .

5- حدد فى اي مسجد سوف تصلى التراويح

وحدد لنفسك صحبة تمرون على بعضكم البعض للذهاب للصلاة .

6-حدد عدد الركعات التى سوف تصليها فى التهجد .

7-ارفع شعار ... لن تفوتنى اى صلاة فى المسجد ... مهما كان

8- احرص على القيام برحلة حج وعمرة يوميا فى رمضان

(( من صلى الصبح في جماعة ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة ))

9- ظبط وحدد الاوقات اللى هتقضيها امام التلفزيون والنت

ويفضل كثيرا الامتناع عن التلفزيون

10- اعمل على افطار صائم يوميا فى رمضان حتى تصوم رمضان مرتين

ويمكن ذلك باعداد وجبة لفقير .. او متسول

او حتى شخص غريب لا تعرفه

ومن الممكن ان يكون معك تمر تهديه لمن تراه فى يومك

وتوصيه بان يفطر عليه ويدعو لك او تعزم اقارب او اصدقاء على افطار

11- اعمل مخطط خاص للايام العشر الاواخر

وكذلك مخطط مفصل بكل ساعة من الليل خاصة ليلة القدر

----------------------------------------

ظبط نفسك ... رمضان على الابواب

بص بقى من الاول كده

لو مش عايز تتظبط قبل ما يجى رمضان

يبقى بلاش تقرأ الموضوع

طيب لو عايز تتظبط يبقى خليك معايا .. وفتح دماغك شوية

قولى الاول انت عايز تتظبط ليه

اكيد عشان تهمك نفسك ويهمك رمضان

طيب هوه رمضان بالنسبالك ايه

يلا .. معايا

هات ورقة وقلم

واكتب فيها رمضان بالنسبالى ايه

وكبرها .. وعلقها على باب الاوضة بتاعتك

علقها على سريرك

علقها على الحيطة اللى بتشوفها وانت نايم على السرير

علقها على باب الشقة اللى بتخرج منه

وعلقها من برة عشان تشوفها وانت داخل

لان ده اللى انت عايزه من رمضان

وبعدين بقى هات ورقة تانية واكتب فيها انت نفسك تكون ايه فى رمضان

وابدأ مع نفسك بالتدريج من دلوقتى

ازاى ...... هقولك

انت مثلا عايز فى رمضان تختم القرآن مرة او اتنين او اكتر

يبقى ابدأ من دلوقتى

اسأل نفسك انت بتقرأ كل يوم قرآن

لو لأ يبقى يلا بسرعة ابدأ واقرأ كل يوم حزب حزبين

وكل يوم كتر عن اليوم اللى قبله

لو أة .. يبقى شوف انت بتقرأ قد ايه كل يوم

وزود عليه حزب حزبين وكل يوم زيادة عن اللى قبله

وقيس على ده كل حاجة نفسك تعملها فى رمضان

خلاص خلصنا الورقة دى

طويب .. هتكتبها بخط حلو كده وتلزقها على باب الدولاب بتاعك .. او على المراية

وبعدين

هتعلن حالة الطوارئ عندك فى البيت

اصل مينفعش تبقى لوحدك

عشان الشيطان ميتشطرش عليك

وانت هتكون فريسة سهلة ليه وانت لوحدك

طيب وحالة الطوارئ دى هيكون شكلها ايه

هنعلق الزينة فى البيت

ونطلع الفوانيس اللى بنشيلها لرمضان

وبعدين هنحط مع بعضنا خطة هنطبقها فى رمضان نتفق عليها كلنا

يلا ابدأ فى التظبيط بسرعة

وبلاش تأجيل ... عشان خلاص مينفعش تأجل أكتر من كده

هختم بكلمة للإمام الشافعى رحمه الله بيقول

طلبنا ترك الذنوب فوجدناه بصلاة الضحى

وطلبنا ضياء القبور فوجدناه في قراءة القرآن

وطلبنا عبور الصراط فوجدناه في الصوم والصدقة

وطلبنا ظل العرش فوجدناه في محبة الصالحين

يارب اجعلني ممن لايحب الا فيك، ولا يبغض الا فيك

إهداء

أهدى هذه التصماميم لحبايب قلبى




الأول لمدونة حور الجنة








الثاني لمدونة بنات افكارى

بس مش عارفة ليه هما شكلهم صغيرين كده

بس مش مهم ابقى ابعتهملكم لما اكلمكم على الماسنجر

بعد كارثة قصر الثقافة

بعد كارثة قصر الثقافة ببنى سويف

التى هزت الرأى العام كله

جاءت إلينا اليوم كارثة جديدة

غرق سفينة البرنسيسة هايدى

وهى سفينة سياية وكانت تقام عليها الأفراح

وشاءت الاقدار ان يكون بها فرح اليوم

منقسم فى الدور الارضى وفى الدور العلوى بها

وما حدث هوه ان السفينة قد مالت على جنبها ناحية الماء

مما تسبب فى سقوط البعض فى الماء

وطبعا ناهيك عن حالة الفزع والرعب التى انتابت الجميع

رأيت وجوه الناس الخارجين منها

منهم المفزوع ... ومنهم من يبحث عن من كان معه فى الفرح .. ومنهم من يبكى

وقد سمعت وجود اطفال فى الماء

وارى عربات الاسعاف بصوتها المفزع

وهى تأتى وتعود وهيا مليئة بالمصابين

وعندما اقتربت من مكان الحاثة

وجدت امة لا اله الا الله مجتمعة

ولكن ماذا يفعلون

يتفرجون

تماما كما حدث فى كارثة قصر الثقافة

الجميع يجرى ...لا لينقذ ... ولكن ليتفرج ويرى ماذا حدث

وطبعا شباب النادى الرياضى ...ايضا كما حدث فى كارثة قصر الثقافة ... خرج يجرى مهرولاً من النادى ليعرف ماذا حدث

فاللهم صبر الاهالى .. ان كان هناك مصابين

وطمئن قلوب المفزوعين

---------------------------------------------------------------

تحديث

صور من الحادثة من مدونة بيجاسوس المصرى وطالع التحقيق الذى قام باعداده مع وجود افلام فيديو مصورة

التاج وصل

اول تاج يوصلنى ... وصلنى من حبيبة قلبى صاحبة مدونة بنات افكارى

هوه تاج طويل شوية .. فيا مسهل

اسم مدونتك

استنى كده .... مممم حد يغششنى

ايوة المساعدة جات

اسمها يا ستو ظبط دماغك

لماذا اخترته ..وماهي نيتك من وراء اختياره؟

مممم ... دى قصة طويلة هتلاقيها هنا هوه ايه اللى ظبط دماغك ده

هل فكرت في إغلاق مدونتك؟ والسبب؟

لا.... خاااالص مااااالص .... مين اللى قال كده

صورتك في المدونة ورمزيتها ؟؟

بصى يا قمر انا فى البداية كنت حاطة صورة بنوتة عسولة قوى

وكنت حاطها لانى بحب الاطفال ... وساعات كتير بحلم انى ارجع طفلة تانى

وكمان لانى حاطة فى التعريف عن نفسى بنوتة واسمى بنت ابيها

وبعدين غيرتها للفراشة اللى انتى شايفاها دى

لان الفراشة خفيفة وبتتحرك فى اماكن كتير

والامكان اللى بتروحها الازهار والاماكن الجميلة

وبعدين دلوقتى بحاول انى ارجعها للبنوتة تانى مش عارفة

لان الموقع مش راضي يحفظ التعديل فى البروفيل بالصورة الجديدة

بس

لماذا دخلت عالم التدوين من الاساس؟

دى برضوا قصة تانية هتلاقيها هنا اخيرا دخلت

جمله قيلت لك فى وصف مدونتك ؟

معتقدش ان فيه حد دخل ووصف مدونتى انما كل اللى بيدخل بيوصف او بيتكلم عن الموضوع اللى كتبته

التعليقات بالنسبه لك ,اهميتها؟

بتفتح مجال للمناقشة ... وكمان انا بحب النقد

وبحس انها نوع من انواع التواصل بينى وبين المدونين التانين

احلى بوست كتبته ...ضع اللينك , ثم اذكر لماذا؟

مممم ..... استنى كده ارجع بالذاكرة لورا

موضوع فتور .. اكتئاب ... زهق

بتقوليلى ليه ... عشان ده كان اكتر موضوع حسيت ان ناس كتير استفادت منه

واكتر موضوع كان فيه تواصل بينى وبين مدونين تانين

أفضل بوست قرأته؟ وضع لينكه؟

استنى ارجع برضوا بالذاكرة لورا ....اخ اتخبطت فى عمود نور وانا برجع

لا حقيقى مش متذكرة افضل بوست قرأته لانى قرات موضوعات كتير كانت كويسة

أفضل مدونة قرأتها؟

مقدرش افضل مدونة عن التانية انما فيه مدونات كتيير كويسة

ها لسه فيه اسئلة

يا مسهل

أسوأ بوست أسوأ مدون؟

خلينى أأجل السؤال لحد لما اشوف نموذج وبعدين ابقى اقولك

هيحصل ايه لإيميلك لما تموت ؟؟

مش عارفة ... مفكرتش فى الموضوع ده ... خليها بظروفها

اديت الباسورد لمين ؟

ده انا حتى كل فترة بغيره ...... No One

كانت إيه طبيعة علاقتك بيه؟

ولا اعرفه يا بيه ... ولا شفته قبل كده

يااه ده لسه فيه اسئلة تانى

اسمك؟

انا عايزة محامى ... امتنع عن اجابة هذا السؤال لحد لما يجى المحامى بتاعى

احنا متفقناش على كده

المشهور بيه وسط اصحابك؟

الاسماء كتيير

انما اكتر اسم عجبنى فيه بعض اصحابى مسجلينى على الموابيل بتاعهم باسم عبقرينة

شخصيتك نوعها إيه؟

عادية خالص ...انما اقدر اقول انها متقلبة

السفر بالنسبة لك؟

متعة ... وترويح عن النفس

وفى بعض الاحيان بيعملى ريفريش

وقت فراغك بتعمل فيه إيه؟

بالنسبة لوقت الفراغ فى اغلب الاوقات بقرأ كتاب ... او بشاهد برامج فضائية

المود بتاعك؟

مودى دلوقتى يعنى ولا العموم بتاعى

هعتبر انك تقصدى الاتنين دلوقتى انا مشغولة وورايا ميت حاجة عايزة اعملها ... وده مودى فى اغلب الاوقات

الصفات اللي أخدتها من بابا؟

انا ساعات بحس ان كل حاجة حلوة فيا اخدتها منه... الصبر .. الطيبة .. حب الاطفال .. قضاء حوائج الغير

ربنا يخلهولى

الصفات التي أخدتها من ماما ؟

تقدرى تقولى الحرص على اداء عباداتى وعدم التقصير فيها ... وانى اعاقب نفسى لما اقصر فيها

ربنا يخليهالى

اكتر ست حاجات بكرهها؟

الواسطة اللى خربت كل حاجة فى البلد ... ان حد يشوف الغلط وميتكلمش ... الانانية ... القسوة ... عدم مراعاة مشاعر الغير والتماس الاعذار لهم ... الكذب

اكتر ست حاجات بحبها؟

الالفة والمحبة بين افراد الاسرة ... انسان متعاون ... التضحية ... الاطفال ...المناجاة ...الكمبيوتر

الانترنت بالنسبه لك؟

بالنسبالى حاجة مهمة واساسية .... بحتاجه فى مجال عملى كتيير

امرره لمين ؟

امرره لاصحاب المدونات دى

احلى ما فى الدنيا ... شروق الشواف

انا كده ... اروى الطويل

هاعيش واتحدى احزانى ... اسماء العريان

جسر التواصل .... المجاهدة

الفجرية ... اسماء ياسر

اسلامنا عزنا ... اخت مسلمة

عصفور المدينة

اكتب بالرصاص

واعدو .... محمد النجار

جميلة بو حريد

حياتنا كلمات ... ياسر سليم

مش انا ... مهندس علاء

راجى عفو الله ... الطائر الحزين

دينامو الاخوان ... ياسر مدنى

وشرفك يا بلدى سحابة وتعدى ... محمد عبد الجليل

اكلتك المفضلة؟

يعنى مفيش اكلة مفضلة .. انما فيه اكلات كتيير بحبها خدى عندك مثلا ... مكرونة بالباشميل .. البامية ... القلقاس

الشغل بيمثلك ايه؟

يااااه كتييير ... خبرة .. نشاط ... استفادة بالوقت .. دخل مادى

--------------------------------------------------------------------

يااه الحمد لله التاج خلص ... مش مصدقة نفسى

الحمد لله

يوم فى حياتى

وانا جالسة مع صديقتى وجارتى ... رن موبايلى

نظرت إلى الأسم ... وجدتها صديقة من اصدقاء الكلية

فعلمت انها ترن فقط

ثم طالت الرنة ... فتأكدت انها تريد ان تكلمنى

ــ السلام عليكم

ـ وعليكم السلام

ـ إزيك يا سمسمة عاملة ايه

ــ الحمد لله .. بقلك ايه انا عازماكى النهاردة عشان تيجى حنتى النهاردة

ــ بجد .. طيب الف مبروك يا قمر ... بس انا معرفش المكان

ــ أنا اتصلت بالشلة وعزمتهم و (... ) عارفة المكان ... لمو بعض وتعالوا

ــ خلاص ان شاء الله

ــ لازم تيجى .. مهم عندى انك تيجى

ــ انتى بتتكلمى ازاى ... ان شاء الله جاية

ــ طيب سلام عليكم

ــ وعليكم السلام

سمسمة دى بنت عرفتها فى الجامعة واتخرجت معانا السنادى ... كانت بنت عادية بس بتحب دينها قوى ... وحضرت كتب كتابها فى اجازة نص السنة

وكانت ساعتها هتموت وتعمل فرحها اسلامى .. وعملت خناقات بسبب الموضوع ده

لكن معرفتش تعمله اسلامى

المهم

اتصلت بـ ( .... ) اللى هيا عارفة البيت .. لاقيتها مش هتقدر تروح لانها مش مظبطة ظروفها من قبليها

وقعدت توصف ليا فى البيت .... لكن على مين ... ولا عرفته

اصل المنطقة اللى هيا ساكنة فيه مش بروحها كتير .. ومعرفهاش قوى

المهم اتصلت على واحدة تانية لاقيتها رايحة قلتلها انتى عارفة المكان ... قالتلى إن سمسمة قالتلها نركب تاكسى وننزل عند ( .... ) وهيا بيتها هناك وهنعرفه من الزيطة والاغانى الاسلامى

قلتلها طيب ... هعدى عليكى نروح مع بعض

قالتلى ماشى

المهم على الساعة 9 لبست ونزلت ورنيت عليها لما ركبت السرفيس

ونزلت على اول شارعها واستينها وجات

وفضلنا واقفين مستنين تاكسى

مفيش تاكسى فاضى ... قعدنا نضحك ونقول اصل البلد غنت

وبعدين قلنا مش مشكلة مش لازم تاكسى فاضى

ممكن نركب مع واحد معاه زبون جانبه واحنا نركب ورا

بس نلحق نوصل عشان نلحق نروح

وبعدين ربنا رزقنا بسواق تاكسى .. كان معاه زبون وقلناله ( ... ) قالنا ماشى

ركبنا وقعدنا نتساهر ... اصلنا كنا مشفناش بعض من زمان ... والحدث ده اللى لمنا على بعض

وبعدين طلع ان الزبون اللى راكب معانا كان رايح فى مكان بعيد عن المكان اللى احنا كنا رايحينه

يعنى سواق التاكسى لف بينا البلد

المهم وصلنا بالسلامة

وكانت الاغانى اللى شغالة فى الحنة نظام العنب والنهارده فرحى

ودخلنا من الباب لاقيناها واقفة على السلم ولابسة خمار على راسها ... وشكلها زي شكل اللى خارج من خناقة

المهم سلمنا عليها وقلنالها الف مبروك ...وبعدين سألناها فيه ايه مالك

قالت مفيش حاجة

وبعدين شافت حد طالع على السلم كانت تقريباً تعرفه

راحت مكلماها وبتقوله ايه اللى شغال ده ... وبعدين احنا ركنا على جنب مسمعناش باقى الكلام

لكن لاقيناها فتحت فى العياط ... والجدع يسكتها

رحنالها .. فيه ايه مالك يا سمسم

طلع انها زعلانه انهم قلبوا الدى جى لاغانى هابطة

وفضلوا كل اللى حواليها يسكتوا فيها

لحد ما الحمد لله اللى كانت بتكلمه ( اللى طلع انه خالها ) خلا بتوع الدى جى غيروا الاغانى وبقت اسلامية

كفاية سرد فى الحكاية لحد كده

Stop لانى فى الحتة دى عملت لنفسى

لانى بدأت احلل الموضوع

اولا طبعاً : هيا بصراحة عجبتنى جداً فى موقفها وثباتها على مبدئها انها عايزة حنتها تكون اسلامية

واللى عرفناه منها بعد كده انها عملت خناقة كبيرة قوى مع زوجها واهله عشان تخلى الفرح اسلامى ... لكن برضوا منجحتش

ثانياً : انا بصيت على الجو اللى حواليها ( ده بعد ما طلعنا من على السلم ودخلنا الشقة )ـ

لاقيت ان الكل عايز الاغانى الهابطة دى .. يعنى هيا لوحدها .. حتى من أهلها ( لكن هما مشغلين الاسلامى عشانها .. وان هيا العروسة ومش عايزين يزعلوها )ـ

يعنى بجد الواحد يسترجع ذكريات ناس تانية ملتزمة ماكانوش ثابتين على مبدأها ده زى ثباتها

حقيقى مش عارفة اقول ايه غير

بارك الله لكما وبارك عليكما .. وجمع بينكما فى خير

وربنا يوفقك ويسعدك فى حياتك يا سمسم ... زى ما انتى عايزة تبدأى حياتك على طاعته

فمتخافيش اكيد هو كمان هيساعدك انك تستمرى حياتك على طاعته