نداء الى كل مدون سويفى

دعوة لمدونى بنى سويف

لانشاء مدونة جماعية تتحدث عن بنى سويف

الفكرة بدات لما المدون بيجاسوس المصرى كتب تدوينة وذكر فيها مدونين بنى سويف

وكان الاقتراح لانشاء رابطة تدوينية للسوايفية

الفكرة لسه تحت الانشان

يعنى ان شاء الله هنفكر مع بعض للموضوع

يعنى هنخليله راس ورجلين وزراعين

وكده

فكل مدون سويفى متفق معانا وعنده استعداد انه يكون فى هذه الرابطة

يسيبلنا ميله على الياهو

وان شاء الله نتفق مع بعض على ميعاد ونتقابل كلنا على الياهو ونظبط الموضوع

والباب مفتوح لاى اقتراحات مش شرط من مدونين بنى سويف وانما من اى مدون يحب يساعدنا فى فكرتنا

البعبع

الجيش

اصبحت هذه الكلمة بمثابة بعبع الشباب

فالكل لا يريد ان يدخل الجيش

الكل يتمنى أن يأخذ الاعفاء

الكل يقول لأهله ان يدعوا له بأخذ الإعفاء

وهناك من يتحايل على الامر ولا يكتفى بالتمنى والدعاء

فهناك من يتمارض ويأتى بالشهادات الطبية المزيفة

وهناك من ياخذ برشام ليبدوا ضعيف القلب او ما شابه

وهناك من يتهرب من الجيش

وهناك من يقطع اصبع يده او قدمه

والعديد من الوسائل التى اصبح الشباب يبتكروا فيها

لمجرد أخذ الاعفاء

فلماذا اصبح دخول الجيش بعبع بالنسبة لهم

هل لان الجيش عبارة عن سباب وشتائم وجوع وبهدله ومرمطة

ام ان شبابنا اعتادوا على الترف والراحة والرخاء

ام ان سنوات الجيش ستقطع من عمره وقت يستطيع ان يجهز نفسه فيه ويهؤهل نفسه للزواج

ام ماذا؟؟؟؟؟؟؟

وسؤالى الاخير هوه

لماذا اصبح دخول الجيش بعبع او آفة بالنسبة للشباب؟؟؟؟؟؟؟؟

هل لديكم اجابة

كلاكيت تانى مرة

تاج وصلنى من بنات افكارى

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

قلت اختار عصر الملك فاروق ... اشمعنى ... عشان كان عصر الانجليز ومحاربة المحتل .... يمكن ربنا ساعتها كان كتبلى شهادة ... اصلى عايزة اموت شهيدة ان شاء الله

أول أولوية فى حياتك عيلتك ولا شغلك ولا اصحابك؟

والله الاولوية دى بتتحدد على حسب الموقف اللى انا فيه

وكل موقف بظروفه واولوياته

ايه أكتر حاجة بتحبها فى رمضان ؟

جو رمضان وروحانياته ورقة القلب فيه

اوصف أجمل فطار ممكن تفطره؟

سواء فطار فى يوم عادى او فى رمضان ... لما الفطار بيكون مع لمة بحبها اياً كان الاكل ايه ... بيكون اجمل فطار فطرته فى حياتى

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

مممممممممممم ... انا مش هاخد السؤال بمعناه الحرفى

انما هجاب عليه على اساس انى ممكن اكون حاكمة فى فترة من الزمن على اخواتى الاصغر منى فى حالة غياب بابا وماما او سفرهم

واقدر اقولك انى مش هكون عادلة لان هنا مش بتكون بقواعد واحد اتنين

لانه بتحكمها العلاقات الانسانية ورصيد كل واحد

مين أكتر اعلامى مصرى بتحترمه ؟

لا حقيقى الاعلام المصرى بدأ يكون فيه نوع من التطور وان كان بسيط

وده من ناحية تعاطيه مع قضايا الفساد فى البلد

وفيه اعلاميين كويسين منهم منى الشاذلى صاحبة برنامج العاشرة مساءا

ومحمود سعد فى برنامج البيت بيتك

لو ممكن تشتغل شغلانة تانية كنت تتمنى تبقى ايه ؟؟

شغلانة تانية ... شغلانة تانية
مدرسة فى حضانة اطفال

ايه تانى بلد تتمنى تعيش فيها بعد مصر ؟؟

مش محتاجة انك تسألينى السعودية طبعا

عشان املى عينى كل يوم بيت الله الحرام

اوصف ترتيبات اجمل فرح ممكن تحضره ؟

هوه انا هقولك على ترتيبات فرح جميل خالص انا حضرته

كان فى سمالوط فى المنيا واجمل ما فى الفرح كان الزفة يا بنتى

واحنا فى الزفة اللى هيا قبل من الكوافير للنادى

الموضوع كان عامل زى ما يكون مظاهرة مش فرح

كان الصف الاول شابين ماسكين لافتة تهنئة من الاخوان المسلمين بالعروسين

ووراهم على طول اشبال كتييير قوى وماسكين بالونات بس طبعا منظمين فى صفوف

ووراهم الشباب والرجال وكانوا كتيير

وبعديهم عربية نص نقل وكان فيها سماعات وميكروفون وكان اخو العروسة مغنى فى فرقة

فكان ماسك المايك وعامل يغنى وشباب تانى معاه بيضربوا بالدف

ووراهم بقى العربيات

اللمة دى فضلت ماشية ولفت البلد لحد ما وصلنا عند طريق العربيات وخلصت

ورحنا بعد كده النادى

وكان عند البنات عاملين صفين وكل واحدة منهم ماسكة اطواق مزوقنهم

بس كده وبعدين الفرح بدأ عادى

حقيقى الفرح ده عمرى ما هنساه

يلا عقبال فرحك كده وانا اعملك اجمد ترتيب ليه

بس انتى انوى بس

بتراعى كلام الناس والقيل والقال ؟؟ ولو اه او لا قول ليه ؟

بصى يا قمر

عمر ما كلام الناس هيثبت على حال ولا هيخلص

وانا مش ناوية يجيلى الضغط بدرى

بس

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟

هيا طبعا السعادة مش هتكون مطلقة

انما اقدر اقولك ان وقت كتير منى هيضيع

وناس كتير ممكن ما تلاقينيش

وانا برضوا ممكن ما الاقيش ناس اكون محتاجاهم

وناس مسافرة مش هسمع صوتها ولا اشوفهم

السعادة هى ..؟

حقيقى ردك على السؤال ده جميل عشان كده هستعير ردك

قيل للسعادة اين تسكنين؟...................................قالت فى قلوب الراضين
قيل فبما تتغذين؟.......................................قالت من قوة ايمانهم
قيل بما تدومين؟.......................................قالت بحسن تدبيرهم
قيل فبما تستجلبين؟..............قالت ان تعلم النفس ان لن يصيبها الا ماكتب الله لها
قيل فبما ترحلين؟................قالت بالطمع بعد القناعة
وبالحرص بعد السماحة وبالهم بعد السرور وبالشك بعد اليقين

عندك أمل ؟ اسبابك ؟

اكيد طبعا

يعنى لو الامل ضاع منك يبقى انتى ضعتى

لما بتحب تهرب من كل شئ بتروح فين ؟؟

كان الاول بروح عند صديقة ليا انتيمتى

لكن هيا حاليا مسافرة خارج مصر (يارب ترجع بالسلامة)ـ

فبالتالى ممكن اخرج اتمشى على الكورنيش او ادخل انام

امتى اول مرة خدت فيها نفس طويل وقلت ياااه انا فعلا كبرت ؟؟

مريت بازمة وحليتها لوحدى من غير تدخل حد من العائلة

حسيت ساعتها انى ممكن اعتمد على نفسى ويعتمد عليا

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

لا الحمد لله

حقيقى بقول ربنا يهدى

لان اللى هما فيه وباء

بتعرف ايدك اليمين من الشمال ازاى ؟؟

ايدى اليمين على اليمين

والشمال على الشمال

ايه اكتر الة موسيقية بتحبها ؟

مفيش

فى رأيك ليه الذوق والنخوة اتعدموا ؟

هو ممكن تسألى ليه قلوا

لان انا بحس ان دايما العادات السيئة تكتسب سريعا عن العادات الحسنة

والشعب بيتعلم من بعضه

ايه الحاجة اللى لو حصلت لك حتبقى سعيد اوى ؟

انى اسافر

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

كام عمارة

عشان كنت أأجرهم باسعار مخفضة عشان احل ازمة الشقة للخطاب

وبالمرة نخفف الازمة السكانية

البحر ولا النيل ؟

هوه مينفعش الاتنين

كل واحد وليه وقته

مركب ولا طيارة ؟

مركب

مجنون ولا عاقل ؟

مجاقل

تقرا كتاب ولا تتفرج على فيلم ؟

على حسب موضوع الكتاب وموضوع الفيلم

تمرر التاج ده لمين ؟

اخيرا وصلت للاخر

امرره لـ

حور الجنة

my finger print

بيجاسوس المصرى

ايه اللى بيحصل

كدا وبتاع

خبيب

بحب الحرية

حائر فى دنيا الله

مللت الصمت

وشرفك يا بلدى سحابة وتعدى

حياتنا كلمات

جميلة بو حريد

دعوة لن تموت

احلى ما فى الدنيا

اول مرة اعرف

كلنا عارفين طبعا حديث الرسول صلى الله عليه وسلم الخاص بصيام الست من شوال بعد شهر رمضان

قال كان صلى الله عليه وسلم : (من صام رمضان ثم أتبعه ستاً من شوال فذلك صيام الدهر)ـ

فكنت اخد معناه ان صيام رمضان ثم صيام ست ايام من شهر شوال كانما صيام الدهر

والمعنى أن من واظب على صيام رمضان وستة أيام من شوال في كل سنة فكأنما صام طوال حياته

وذلك لان من صام رمضان وستاً من شوال فكأنما صام سنة واحدة

وذلك لأن الحسنة بعشرة أمثالها

فصيام شهر رمضان يساوي عشرة شهور

أما صيام 6 أيام من شوال يساوي شهرين وهما المكملان للسنة

كل عام وانتم بخير

جاء العيد ومعه اول فرحة من فرحتى الصائم ... فرحة عند فطره

فالعيد هو يوم الجائزة

واليوم القلب متقلب بين حزن على فراق رمضان

ورجاء من ان يتقبل الله منا جميع اعمالنا فى شهره الكريم

وفرحة بلقاء العيد والفطر

فكل عام وانتم بخير

ربى

ربى إنى بباك ... اطرقه

أستغفرك ... اتوب إليك

أسترحمك ... أستعطفك

أرجوك

اقبلنى من التائبين ... العابدين ... الحامدين

اجعلنى من عتقائك من النار

واحسن خاتمتى

رمضان لا ترحل

كلمات اعجبتى

تمر اللحظات .. و الدقائق .. تمر الايام

يوم تلو اليوم تمر اعمارنه .. عاما بعد عام

.ترتحل عنا الذكريات سريعا

فهل يا رمضان هذاا العام ستترك فينا بصمات

و ذكريات تخلد معنا فى حياتنا الدنيا و تشفع لنا بها عند رب البريه ؟؟كعادته كل عام

يمر علينا مرور الكرام .. ما لبسنا مرحبين فغدونا مودعين كلنا يعلم مدى شوقنا لزيارتك فانت تغيب عنا و تعدنا بعد كل عام زياره

ننتظرك .. نعد العده للقياك .. فانت الضيف الودود يجتمع حولك الاهل و الاحباب بصغيرهم و كبيرهم .. يانسوا بك

فلا نشعر بالوقت يمضى سريعا ..و يابى الدهر ان يتركنا فى رحابك

فوجودك له حكمه و ارتحالك له سبب .. و ياليت العام كله رمضان اخوتى و احبائى قد تنظروا الى المقدمه و تقولوا لسه بدرى او الشهر لم ينتصف بعد

و لكن لو تذكروتم اننا كنا بالامس القريب نقول غدا رمضان و كانها غفوه او ساعه

و ووجدنا انفسنا تخطينا ايام و ليالى مباركات من هذا لاالشهر

فاذكركم عسى ان تجد كلماتى لديكم صدى .. تنبيها لا اكثرو لت ايام الرحمه

و كان لابد من وقفه فليقف كل منا امام خطته و ليقيم نفسه و ليضف كل منا سوال واحدا اضافيا

هل رحمنا الناس ليرحمنا ربنا فى ايام الرحمه كما قال نبينا صلى الله عليه وسلم " ارحموا من فى الارض يرحمكم من فى السماء " ؟؟

و تعاودنا الفرصه من جديد .. مرحله جديده باهداف و استراتيجيه جديده فقاعده الرحمه " ارحم ترحم "

اما قاعده المغفره " و ليعفوا و ليصفحوا " برده اصفح عن الناس و عن من ظلمك يصفح الله عنك و يعفو و يخاطبك ربك برحمه

و هو يعلم كيف هو تشعر و اناتك من ظلم بنى البشر لك سمعها فيخاطبك ليزيد دافعيتك و يثبتك على العفو

و الصفح الجميل " وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ ؟؟؟ "

عشان نستشعر فعلا قيمه المرحله التانيه ( ايام المغفره العشره ) و فضلها

افتكروا الآثام و المعاصى امسك ورقه و قلم و اكتب و افتكر قول الله تبارك و تعالى " و يعلم ما جرحتم بالنهار " افتكر قبل رمضان

فى الصيف .. الكليه .. و افضل ارجع لورا وصلت لثانوى .. ؟؟عنيك دمعت و لا لسه ؟

دا انت قلبك قاسى اووووى

ازاى نسيت كل ده ؟؟

و ازاى كنت بتبص لنفسك و تقول انا الحمد لله كويس و ملتزم

و كل ما تشوف واحد على معصيه يضغر فى عينك و تبص له بامتعاض " ايه اللى بيعمله ده ؟؟ "

" كذلك كنتم من قبل فمن الله عليكم " تعالوا نعيد لانفسنا التواضع و الذل و الخشوع بين يد الله .. و نقول للنفس وداعا للعجب و الغرور لا

تنسى كيف كان حالك و الى الى ماذا مآلك

بعتذر عن الاطاله و ربنما يصلح لنا الحال و اياكم

عادات رمضانية

فيه عادات كده خاصة برمضان الواحد جايز بيشوفها كل رمضان دايما

ومنها العادات الكويسة ومنها العادات السيئة

انك تلاقى الشباب يلموا بعض قبل الفطار بنص ساعة او اكتر ويلعبوا كرة قدم

ان تلاقى طوابير قبل المغرب على بياع التمر الهندى والعرقسوس

مع ان السنة الافطار على لبن او تمر او ماء

انك تلاقى الاطفال والكبار بيتجمعوا من كل حته وتروح تتفرج على المدفع وهوه بيضرب وبعدين يجروا يروحوا وهما فرحانين

انك تلاقى اكتر موسم بينشط فيه بيع الزبادى هوه رمضان

انك تلاقى الخيم الرمضانية بتنتشر فى كل مسجد

انك تلاقى السهرات الرمضانية اللى ملهاش علاقة اساسا برمضان

انك تلاقى الشباب يسهر لحد السحور فى الشارع وعلى القهاوى وبعدين يتسحر وينام

انك تلاقى العائلات يعزموا بعض

ويتلموا مع بعض على اكلة واحدة

انك تلاقى المسحراتى بيلف الشوارع وقت السحور

انك تلاقى الاطفال بعض الفطار يخرجوا للشارع

ومعاهم الفوانيس ويغنوا اغانى رمضان

والفرحة مش سايعاهم

انك تلاقى كل يوم بعد الفطار شخص يخبط عليك ويقولك "لله"ـ

انك تلاقى البيتوت متزينة والشوارع متزوقة

انك تلاقى المساجد متزينة بالانوار الجميلة

احاسيس جميلة قوى لما تتمشى فى الشارع بالليل فى رمضان

وتشوف كل الحاجات اللى بتحسسك بروعة رمضان

من سيربح المليون .. بل الملاااااين

مبارك عليكم الشهر

تعالوا نخطط

تحديث

متنسوش ادلى بصوتك فى السؤال

-------------------------------------------------

لما بتكون رايح مصيف

مش بتخطط لكل يوم هتعمل فيه ايه

ده كمان ساعات بتخطط كل ساعة هتعمل ايه

وتقول دول كلهم كام يوم هقضيهم فى المصيف

هوه انا كل يوم بصيف

لازم استغل كل وقت وكل دقيقة فيه

طيب هوه رمضان عندنا اقل من المصيف او رحلة او معسكر بتخطط ليه

طيب هخطط وهحط ايه

اليكم بعض الاقتراحات :ـ

1- جهز 30 دعوة وكل دعوة هتكون مخصصة ليوم

يعنى اليوم كله فى كل صلواتك بتدعى الدعوة دى .

2- حدد لنفسك هتختم القرآن فى رمضان كام مرة.. وقسمه على أيام الشهر .

3- حدد لنفسك صدقة يومية .. وهتديها لمين او هتحطها فين

حتى لو ربع جنيه كل يوم ... المهم الاستمرارية .

4- حدد لنفسك 30 ذكر

بحيث كل يوم ذكر يظل لسانك يردده طوال

وتكون عارف فايدة الذكر وانت بتردده ومستشعر فائدته .

5- حدد فى اي مسجد سوف تصلى التراويح

وحدد لنفسك صحبة تمرون على بعضكم البعض للذهاب للصلاة .

6-حدد عدد الركعات التى سوف تصليها فى التهجد .

7-ارفع شعار ... لن تفوتنى اى صلاة فى المسجد ... مهما كان

8- احرص على القيام برحلة حج وعمرة يوميا فى رمضان

(( من صلى الصبح في جماعة ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة ))

9- ظبط وحدد الاوقات اللى هتقضيها امام التلفزيون والنت

ويفضل كثيرا الامتناع عن التلفزيون

10- اعمل على افطار صائم يوميا فى رمضان حتى تصوم رمضان مرتين

ويمكن ذلك باعداد وجبة لفقير .. او متسول

او حتى شخص غريب لا تعرفه

ومن الممكن ان يكون معك تمر تهديه لمن تراه فى يومك

وتوصيه بان يفطر عليه ويدعو لك او تعزم اقارب او اصدقاء على افطار

11- اعمل مخطط خاص للايام العشر الاواخر

وكذلك مخطط مفصل بكل ساعة من الليل خاصة ليلة القدر

----------------------------------------

ظبط نفسك ... رمضان على الابواب

بص بقى من الاول كده

لو مش عايز تتظبط قبل ما يجى رمضان

يبقى بلاش تقرأ الموضوع

طيب لو عايز تتظبط يبقى خليك معايا .. وفتح دماغك شوية

قولى الاول انت عايز تتظبط ليه

اكيد عشان تهمك نفسك ويهمك رمضان

طيب هوه رمضان بالنسبالك ايه

يلا .. معايا

هات ورقة وقلم

واكتب فيها رمضان بالنسبالى ايه

وكبرها .. وعلقها على باب الاوضة بتاعتك

علقها على سريرك

علقها على الحيطة اللى بتشوفها وانت نايم على السرير

علقها على باب الشقة اللى بتخرج منه

وعلقها من برة عشان تشوفها وانت داخل

لان ده اللى انت عايزه من رمضان

وبعدين بقى هات ورقة تانية واكتب فيها انت نفسك تكون ايه فى رمضان

وابدأ مع نفسك بالتدريج من دلوقتى

ازاى ...... هقولك

انت مثلا عايز فى رمضان تختم القرآن مرة او اتنين او اكتر

يبقى ابدأ من دلوقتى

اسأل نفسك انت بتقرأ كل يوم قرآن

لو لأ يبقى يلا بسرعة ابدأ واقرأ كل يوم حزب حزبين

وكل يوم كتر عن اليوم اللى قبله

لو أة .. يبقى شوف انت بتقرأ قد ايه كل يوم

وزود عليه حزب حزبين وكل يوم زيادة عن اللى قبله

وقيس على ده كل حاجة نفسك تعملها فى رمضان

خلاص خلصنا الورقة دى

طويب .. هتكتبها بخط حلو كده وتلزقها على باب الدولاب بتاعك .. او على المراية

وبعدين

هتعلن حالة الطوارئ عندك فى البيت

اصل مينفعش تبقى لوحدك

عشان الشيطان ميتشطرش عليك

وانت هتكون فريسة سهلة ليه وانت لوحدك

طيب وحالة الطوارئ دى هيكون شكلها ايه

هنعلق الزينة فى البيت

ونطلع الفوانيس اللى بنشيلها لرمضان

وبعدين هنحط مع بعضنا خطة هنطبقها فى رمضان نتفق عليها كلنا

يلا ابدأ فى التظبيط بسرعة

وبلاش تأجيل ... عشان خلاص مينفعش تأجل أكتر من كده

هختم بكلمة للإمام الشافعى رحمه الله بيقول

طلبنا ترك الذنوب فوجدناه بصلاة الضحى

وطلبنا ضياء القبور فوجدناه في قراءة القرآن

وطلبنا عبور الصراط فوجدناه في الصوم والصدقة

وطلبنا ظل العرش فوجدناه في محبة الصالحين

يارب اجعلني ممن لايحب الا فيك، ولا يبغض الا فيك